აჭარის ავტონომიური რესპუბლიკის ოფიციალური დელეგაცია 24- 25 მარტს, ქ. სტრასბურგში, საფრანგეთში გამართულ ევროპის საბჭოს ადგილობრივ და რეგიონალურ ხელისუფლებათა 28-ე კონგრესს ესწრება. დელეგაციის შემადგენლობაში არიან აჭარის მთავრობის თავმჯდომარე არჩილ ხაბაძე, აჭარის ფინანსთა და ეკონომიკის მინისტრი დავით ბალაძე, აჭარის განათლების, კულტურისა და სპორტის მინისტრი გიორგი თავამაიშვილი და უმაღლესი საბჭოს წევრები. ევროპის საბჭოს ადგილობრივ და რეგიონალურ ხელისუფლებათა კონგრესში 47 ქვეყანა მონაწილეობს. სხდომებზე სხვადასხვა პრობლემატურ საკითხს განიხილავენ. გაიმართება დებატები შემდეგ საკითხებზე: ადგილობრივი და რეგიონალური დემოკრატიული პროცესები, ევროპული ქალაქებისა და რეგიონების პასუხისმგებლობა, უმცირესობათა უფლებები, ანტისემიტიზმი, სიძულვილის ენა, ტერორიზმის წინააღმდეგ ბრძოლა. კონგრესის მიმდინარეობის დროს ევროპის საბჭოს ფოიეში აჭარის ავტონომიური რესპუბლიკის ისტორიულ-კულტურული სიმდიდრის და ტურისტული პოტენციალის ამსახველი სპეციალური სტენდია წარმოდგენილი. აქვე, სარეკლამო მასალებთან ერთად, სამი დღის მანძილზე გაიმართება აჭარის ღირსშესანიშნაობების ამსახველი ვიდეო ჩვენება.
”2 დღის განმავლობაში აჭარის დელეგაცია მიიღებს მონაწილეობას განხილვებში, მოსმენებში. პარალელურად, ჩვენ წინა წლიდან მოყოლებული შეთანხმებულნი ვართ და ხვალ შუალედებში უნდა წარმოვადგინოთ ჩვენი რეგიონი, ჩვენი რეგიონის პოტენციალი, როგორც საინვესტიციო, ასევე ტურიზმის მიმართულებით. წინ უნდა წამოვწიოთ გავაცნოთ მთლიანად ქვეყანა, და ჩვენი რეგიონი სხვა რეგიონებს. ეს კი სამომავლოდ წაადგება ჩვენი ქვეყნის პოპილარიზაციას, ინვესტიციების მოზიდვას იმ ქვეყნებიდან რომლებიც კონგრესში მონაწილეობენ. ვფიქრობ სამომავლოდ ასეთი ურთიერთობები გაგრძელდება და კიდევ არაერთ ღონისძიებას დავგეგმავთ”, - განმარტავს აჭარის მთავრობის თავმჯდომარე არჩილ ხაბაძე.
25 მარტს აჭარის რეგიონი სპეციალურ მიღებას გამართავს, რომელსაც კონგრესმენები და სხვა მოწვეული სტუმრები დაესწრებიან. შეგახსენებთ, რომ საქართველო გახდა ევროპის საბჭოს 41-ე წევრი 1999 წელს. ევროპის საბჭო მხარს უჭერს საქართველოს ორგანიზაციის სტანდარტებთან დაახლოების პროცესს. ევროპის საბჭოს გენერალური მდივნის იაგლანდის თბილისში ვიზიტის შედეგად, რომელიც 2014 წლის თებერვალში შედგა, საქართველოს მთავრობამ და ევროპის საბჭომ მიიღეს 3 წლიანი სამოქმედო გეგმა.
