ფინური გამოცემა Helsingin sanomat-ის ინფორმაციით, ფინეთის საგარეო საქმეთა მინისტრმა, ეუთო-ს მოქმედმა თავმჯდომარემ, ელინა ვალტონენმა განაცხადა, რომ საქართველოს პრემიერ-მინისტრ ირაკლი კობახიძესთან დაგეგმილი შეხვედრა არა საქართველოს, არამედ ფინეთის ინიციატივით გაუქმდა გრაფიკის ცვლილების გამო. აღნიშნულია, რომ ამის შესახებ ქართულ მხარეს გუშინ ღამით აცნობეს.
"ვალტონენი ტელეფონით გვიყვება, რომ პრემიერ-მინისტრ კობახიძესთან შეხვედრა არ გაუქმებულა საქართველოს ინიციატივით, არამედ ის გაუქმდა ფინეთის ინიციატივით, გრაფიკის ცვლილების გამო და ამის შესახებ ქართველებს გუშინ ღამით აცნობეს" - წერს გამოცემა.
Helsingin sanomat-ის თანახმად, ვალტონენი უარყოფს საქართველოს მთავრობის მტკიცებას, რომ მან მონაწილეობა მიიღო რაიმე საარჩევნო ღონისძიებაში ან გაავრცელა რაიმე ცრუ ინფორმაცია.
„მე იქ მივედი საქართველოში კვირების და თვეების განმავლობაში მიმდინარე საპროტესტო აქციების სანახავად. მინდოდა გამომეხატა ჩემი მხარდაჭერა გამოხატვის თავისუფლების მიმართ"- ციტირებს გამოცემა ფინეთის საგარეო საქმეთა მინისტრს.
ფინური მედიის ცნობიტ, აზერბაიჯანის პრეზიდენტ ილჰამ ალიევთან და საგარეო საქმეთა მინისტრ ჯეიჰუნ ბაირამოვთან შეხვედრები შეხვედრები ვალტონენს ვიზიტის დასაწყისში ჰქონდა დაგეგმილი, თუმცა გეგმა გაუქმდა მას შემდეგ, რაც აზერბაიჯანის ხელმძღვანელობა ეგვიპტეში გაემგზავრა, სადაც აშშ-ის პრეზიდენტი დონალდ ტრამპი ღაზაში ომის შესახებ სამშვიდობო კონფერენციას მასპინძლობდა.
ეუთო-ს მოქმედი თავმჯდომარე, ფინეთის საგარეო საქმეთა მინისტრი, ელინა ვალტონენი დღეს ბაქოში პრეზიდენტ ილჰამ ალიევსა და საგარეო საქმეთა მინისტრს, ჯეიჰუნ ბაირამოვს შეხვდა.
