გერმანიის კანცლერის, ფრიდრიხ მერცის განცხადებით, უკრაინის კაპიტულაცია რუსეთთან ომში გამორიცხულია, რადგან ეს მისი მოკავშირეების კაპიტულაციასაც ნიშნავს.
ამის შესახებ მერცმა ბერლინში, ეკონომიკურ ფორუმზე განაცხადა.
„ჩვენ უკრაინას მხარს არ ვუჭერთ იმისთვის, რომ ეს ომი გავაჭიანუროთ. მაგრამ კაპიტულაცია, ან თუნდაც უკრაინის უპირობო კაპიტულაცია - გამორიცხულია. ეს ხომ ყველა ჩვენგანის კაპიტულაციაც იქნებოდა“, - განაცხადა გერმანიის კანცლერმა.
მერცის თქმით, გერმანია და ევროპის სხვა ქვეყნები მზად არიან, ნებისმიერ დროს განაახლონ მოლაპარაკებები.
კანცლერმა ასევე აღნიშნა, რომ რუსეთის დეზინფორმაცია და ჰიბრიდული თავდასხმები გერმანიის უსაფრთხოებისთვის ყველაზე დიდ საფრთხეს წარმოადგენს.
მან მოსკოვი ცივი ომის დასრულების შემდეგ ჩამოყალიბებული პოლიტიკური წესრიგის ფუნდამენტურ რყევაში დაადანაშაულა.
„რუსეთი ფუნდამენტურ დარტყმას აყენებს ცივი ომის დასრულების შემდეგ ჩამოყალიბებულ პოლიტიკურ წესრიგს“, - აღნიშნა მერცმა.
მერცის განცხადებით, ამჟამად მისი ყველაზე დიდი შეშფოთების საგანი არა გერმანიის ეკონომიკა, არც აშშ ან ჩინეთი, არამედ რუსეთის გავლენაა გერმანულ საზოგადოებაზე.
„ამჟამად ყველაზე მეტად ის მაწუხებს, თუ რა გავლენას ახდენს რუსეთი ჩვენს საზოგადოებაზე და არა ჩვენი ეკონომიკა, აშშ ან ჩინეთი“, - განაცხადა გერმანიის კანცლერმა.
მერცის თქმით, საუბარია დივერსიებზე, საკომუნიკაციო სისტემებზე განხორციელებულ ჰიბრიდულ თავდასხმებსა და გერმანიის დესტაბილიზაციის მცდელობებზე.
კანცლერმა ხაზი გაუსვა, რომ მსგავსი თავდასხმები ყოველდღიურად ხდება, თუმცა გერმანიაში მათ მნიშვნელობასა და საფრთხეს დღემდე სათანადოდ ვერ აფასებენ.
