პოლიტოლოგ რამაზ საყვარელიძის შეფასებით, ხელისუფლებას ჯერ კიდევ დასამტკიცებელი აქვს, რომ "ვარდების რევოლუცია" დემოკრატიისთვის მომხდარი რევოლუცია იყო.

"ვარდების გუნდის 6-წლიანი მოღვაწეობის პერიოდში ქვეყანამ მიიღო დადებითიც და ისეთი მოვლენებიც, რომელთაც კრიტიკულის გარდა სხვანაირად ვერ შეაფასებ. უდავოდ დადებითად შეიძლება ჩაითვალოს ის, რომ გაიზარდა კანონის პატივისცემა, რისი ერთ-ერთი გამოხატულებაც გადასახადების აკრეფა და ბიუჯეტის შევსება იყო, რისი პრობლემაც წინა პერიოდის განმავლობაში მუდმივად არსებობდა. გარდა ამისა, სახელმწიფო სისტემა უფრო ძლიერი გახდა", - განუცხადა საყვარელიძემ "ჯი-ეიჩ-ენს" "ვარდების რევოლუციის" შედეგებზე კომენტირებისას, საიდანაც ხვალ, 23 ნოემბერს 6 წელი ხდება.

რაც შეეხება უარყოფით მოვლენებს, რისი თავიდან აცილებაც "ვარდების რევოლუციის" გზით მოსულმა ხელისუფლებამ ვერ შესძლო, საყვარელიძის აზრით "2008 წლის აგვისტოს ომის შეცდომაა, რომლის არა თუ დადებითად, ნეიტრალური შეფასებაც კი ძნელია".

"ხელისუფლების მეორე შეცდომად შეიძლება ჩაითვალოს ის, რამაც აგვისტოს ომის შეცდომა გამოიწვია - გადაწყვეტილებების ერთპიროვნულად მიღება. შესაბამისად, შეცდომაა ერთპიროვნული საკადრო პოლიტიკაც, რომლის შედეგადაც ძალიან ბევრი არაკომპეტენტური პირი დაბრუნდა ხელისუფლებაში. ერთპიროვნულობა ხშირად იწვევს კანონის დარღვევას - მოსახლეობას კანონს მკაცრად იცავს, ხელისუფლების მიერ კი ის ძალიან ადვილად ირღვევა. აქედან გამომდინარე, არაკომპეტენნტურობა ხშირად ხდება შეცდომების წყარო და მერე ეს შეცდომები მოსახლეობის კისერზე გადადის. საერთო ჯამში, ბაიდენის სიტყვების ციტირება რომ მოვახდინო, "ვარდების რევოლუციის" დემოკრატიული პროცესი, რისი პრეტენციას ჰქონდა არსებულ ხელისუფლებას, არ დასრულებულა. შესაბამისად, ვარდების გუნდს ჯერ კიდევ დასამტკიცებელი აქვს, რომ ეს სწორედ დემოკრატიისთვის მომხდარი რევოლუცია იყო", - განმარტა "ჯი-ეიჩ-ენთან" საუბარში პოლიტოლოგმა.

შეგახსენებთ, რომ ხვალ, 23 ნოემბერს, "ვარდების რევოლუციის" 6 წლისთავია.