ნატო-ს გენერალურმა მდივანმა მარკ რუტემ განაცხადა, რომ უკრაინას საკუთარი თავის დაცვისა და რუსეთის ლოგისტიკურ კვანძებზე დარტყმის უფლება აქვს, მათ შორის ყირიმის ხიდზე.
ამის შესახებ რუტემ 17 ნოემბერს, ბრიუსელში, უკრაინის თავდაცვის საკონტაქტო ჯგუფის, ე.წ. „რამშტაინის“ ფორმატის შეხვედრის დაწყებამდე განაცხადა.
მისი თქმით, მნიშვნელოვანია, რომ უკრაინამ თავი დაიცვას, რაც რუსეთის ლოგისტიკურ კვანძებზე დარტყმებსაც გულისხმობს.
რუტემ კონკრეტულად უკრაინის მიერ ქერჩის ხიდზე განხორციელებულ ბოლო იერიშზე ისაუბრა და აღნიშნა, რომ მედიაში გავრცელებული კადრებით, უკრაინამ, როგორც ჩანს, წარმატებას მიაღწია.
„რა თქმა უნდა, უნდა ვნახოთ, კონკრეტულად რა მოხდა. თუმცა, მედიაში გავრცელებული კადრების მიხედვით, როგორც ჩანს, მათ წარმატებას მიაღწიეს. მაგრამ კიდევ ერთხელ ვიმეორებ, უნდა გავარკვიოთ, ზუსტად რა მოხდა“, - განაცხადა ნატოს გენერალურმა მდივანმა.
რუტეს თქმით, უკრაინის მიერ რუსეთის ლოგისტიკურ კვანძებზე დარტყმები თავდაცვის ნაწილია.
შეგახსენებთ, 17 ნოემბრის ღამეს ყირიმის ხიდზე მორიგი იერიშის შედეგად ხიდის ერთ-ერთი თაღი ჩამოინგრა. ხიდზე სატრანსპორტო მოძრაობა შეჩერდა.
შეგახსენებთ, ყირიმის ხიდზე დარტყმა გუშინაც განხორციელდა, რის შედეგადაც მოძრაობა თითქმის 17 საათის განმავლობაში იყო შეზღუდული.