უკრაინის პრეზიდენტი ვოლოდიმირ ზელენსკი ევროპული საბჭოს პრეზიდენტ ანტონიო კოშტასა და ევროკომისიის პრეზიდენტ ურსულა ფონ დერ ლაიენს შეხვდა და მათ აბუ-დაბიში გამართული შეხვედრების შესახებ ინფორმაცია მიაწოდა. ამის შესახებ უკრაინული მედია იუწყება.
შეხვედრა 12 ნოემბერს, დუბლინში, ევროპის პოლიტიკური გაერთიანების სამიტის ფარგლებში გაიმართა.
ზელენსკის განცხადებით, აბუ-დაბიში გამართული შეხვედრების ცალკეულ ღონისძიებებს ევროპელი წარმომადგენლებიც ესწრებოდნენ. მისი თქმით, მნიშვნელოვანია, რომ ევროპა რუსეთთან მოლაპარაკებებში სრულფასოვნად იყოს წარმოდგენილი.
„განსაკუთრებით მაშინ, როდესაც საუბარია ევროპაში უსაფრთხოებაზე, ევროპის მხრიდან უკრაინის მხარდაჭერასა და ნებისმიერ ვალდებულებაზე, რომელსაც ევროპა საკუთარ თავზე აიღებს“, - აღნიშნა ზელენსკიმ.
მისივე ინფორმაციით, შეხვედრაზე ასევე განიხილეს ევროკავშირთან შეთანხმებები უკრაინისთვის ზამთრის გადასატანად დამატებითი დახმარების გამოყოფის შესახებ.
„იმედი გვაქვს, რომ უახლოეს მომავალში მივიღებთ ენერგეტიკულ და ჰუმანიტარულ დახმარების პაკეტებს, ასევე დახმარებას თავშესაფრების მოწყობაში“, - განაცხადა უკრაინის პრეზიდენტმა.
მხარეებმა ასევე შეათანხმეს პოზიციები მოლაპარაკებების ბოლო ორი კლასტერის გახსნისა და უკრაინის ევროკავშირში გაწევრიანების პროცესში შემდგომი ნაბიჯების შესახებ.
„უნდა ვეძებოთ მაქსიმალურად სწრაფი და სამართლიანი გადაწყვეტილებები, რომლებსაც იმსახურებს ჩვენი ხალხი, რომელიც მთელ ევროპას იცავს“, - დასძინა უკრაინის პრეზიდენტმა.
