საფრანგეთის პრეზიდენტის, ემანუელ მაკრონის განცხადებით, უკრაინის მიმართ ევროპის მხარდაჭერას გადამწყვეტი მნიშვნელობა აქვს, რადგან აშშ-ის მხრიდან მხარდაჭერა აღარ არსებობს.
ამის შესახებ მაკრონმა ირლანდიის დედაქალაქ დუბლინში, ჟურნალისტებთან საუბრისას განაცხადა.
მაკრონის თქმით, ევროპის ქვეყნებმა თავად უნდა განსაზღვრონ საკუთარი უსაფრთხოება.
„დღეს მნიშვნელოვანია ის, თუ რას ვაკეთებთ უკრაინისთვის და ის, რომ მისი მხარდაჭერა მტკიცედ გავაგრძელოთ“, - განაცხადა საფრანგეთის პრეზიდენტმა.
მისი თქმით, ევროპამ უკრაინის მხარდაჭერის მიმართულებით ერთიანი და მტკიცე პოზიცია უნდა შეინარჩუნოს.
მისი თქმით, ევროპულმა ქვეყნებმა უსაფრთხოების საკუთარი პრინციპები და არქიტექტურა უნდა ჩამოაყალიბონ. მაკრონმა ხაზი გაუსვა, რომ ევროპის მონაწილეობის გარეშე უკრაინის მხარდაჭერა ვერ გაგრძელდება.
საფრანგეთის პრეზიდენტმა ასევე ისაუბრა „მსურველთა კოალიციაზე“ და აღნიშნა, რომ ირლანდიაში შეკრებილი ლიდერები ამ კოალიციის წვლილის, სავარაუდოდ, 80-90%-ს და მთლიანობაში უკრაინისთვის გაწეული მხარდაჭერის ძირითად ნაწილს უზრუნველყოფენ.
„აშშ-ის მხრიდან მხარდაჭერა აღარ არის. რა თქმა უნდა, გარკვეული საშუამავლო ძალისხმევა ხორციელდება და ეს კარგია, თუმცა საბოლოოდ სწორედ ჩვენ, ევროპელებმა უნდა გადავწყვიტოთ, როგორ უზრუნველვყოთ ჩვენი უსაფრთხოება და რა მიმართულებით განვავითაროთ იგი. ამაში ეჭვი არ მეპარება", - განაცხადა მაკრონმა.
