თუ რამე ძირს უთხრის ჩვენს ქვეყანას, ამის მსგავსი პროცესებია - ეს სიახლეა, როცა დააჯგუფეს პოლიტიკოსები და ჯგუფურად გვასამართლებენ, - ამის შესახებ „ლელო -ძლიერი საქართველოს“ ერთ-ერთმა ლიდერმა, ბადრი ჯაფარიძემ ე.წ. საბოტაჟის საქმესთან დაკავშირებით განაცხადა, რომლის წინასასამართლო სხდომაც დღეს იმართება.
"თუ რამე ძირს უთხრის ჩვენს ქვეყანას და სახელმწიფოებრიობას ზიანს აყენებს, არის ამის მსგავსი პროცესები. ეს რაღაცა სიახლეა, როდესაც პოლიტიკოსები დააჯგუფეს და ჯგუფურად გვასამართლებენ. ეს არის დიდი ზიანის მომტანი ჩვენი ქვეყნის ინტერესებისთვის", - ამბობს ბადრი ჯაფარიძე.
ე.წ. საბოტაჟის საქმეზე სხდომას მოსამართლე ბესიკ ბუგიანიშვილი გახსნის.
დღევანდელ სასამართლო პროცესს "ძლიერი საქართველოს" ლიდერი, მამუკა ხაზარაძე ჯანმრთელობის მდგომარეობის გამო არ დაესწრება. როგორც ადვოკატი ამბობს, ის სასამართლოს ჯანმრთელობის ცნობას წარუდგენს.
ცნობისთვის, გენერალურმა პროკურატურამ მიხეილ სააკაშვილის, გიორგი ვაშაძის, ნიკა გვარამიას, ნიკა მელიას, ზურაბ ჯაფარიძის, ელენე ხოშტარიას, მამუკა ხაზარაძისა და ბადრი ჯაფარიძის წინააღმდეგ ახალი სისხლის სამართლებრივი დევნა დაიწყო. პროკურატურის ინფორმაციით, საქმე ეხება სახელმწიფოს წინააღმდეგ ჩადენილ დანაშაულებს, კერძოდ: საბოტაჟს, უცხო ქვეყნისათვის მტრულ საქმიანობაში დახმარებას, საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობის დაფინანსებას და საქართველოს კონსტიტუციური წყობილების ძალადობით შეცვლისკენ ან სახელმწიფოს ხელისუფლების დამხობისკენ მოწოდებას.
