მარკ რუტემ ძალიან კარგად იცის, რომ საქართველო წლებია, მზადაა, ნატოში გასაწევრიანებლად, ახლა საუბრობს, თუ სურვილი აქვთ, იმეცადინონო, როცა გვითხრეს, თქვენ ძალიან კარგად ხართ მომზადებულიო?! - მაშინ ამოვუღებთ ამ ვიდეოებს და ვაჩვენებთ, - ამის შესახებ "ხალხის ძალის" დეპუტატმა, გურამ მაჭარაშვილმა ნატო-ს გენერალური მდივნის, მარკ რუტეს განცხადების შეფასებისას აღნიშნა.
„ნატო-ს გენერალურ მდივანს როცა არ აქვს მკაფიო პასუხი, მაშინ ასეთ ძალიან ზოგად და შეურაცხმყოფელ პასუხებს სცემენ ხოლმე. მან კარგად იცის და არა მარტო მან ნატო-ში, რომ წლებია, საქართველო მზადაა, მათივე ინსტიტუტების შეფასებით, ნატო-ში გასაწევრიანებლად. ნატო-ს გენერალურმა მდივანმა კარგად იცის, რომ ქართველი ჯარისკაცების გარდა, ამერიკელ ჯარისკაცებთან ერთად, ვერავინ იბრძოდა, იქნებოდა სიმამაცით, თუ პროცენტული მონაწილეობით საერთაშორისო სამშვიდობო მისიებში. ეს ნატო-ს პირდაპირი აღიარებაა. საქართველო ნატო-ს ჯარებსა და სამშვიდობო მისიებში ისეთი მასშტაბებით და ისეთი ხარისხით მონაწილეობდა, რომ ვერცერთი სხვა ქვეყანა ვერ შეედრებოდა, მათ შორის ნატო-ს წევრი ქვეყნები. ახლა საუბრობს იმაზე, რომ სურვილი თუ აქვთ, იმეცადინონო და ა.შ. როცა გვითხრეს, კარგად ხართ მომზადებულიო? მაშინ ამ ვიდეოებს ვაჩვენებთ. იმასაც, როცა თავად ამბობენ, რომ საქართველო მზადაა ნატო-ში გასაწევრიანებლად, უბრალოდ, პოლიტიკური გადაწყვეტილებაა მისაღებიო“, – განაცხადა გურამ მაჭარაშვილმა.
ცნობისათვის, მარკ რუტემ განაცხადა: ევროატლანტიკურ სივრცეში ნებისმიერ ქვეყანას, რომელიც ასევე შეიძლება, გახდეს ნატო-ს წევრი, შეუძლია, სურვილი გამოთქვას და შემდეგ არსებობს პროცესი, ცხადია, მე არ ვარ გულუბრყვილო იმის შესახებ, რაც საქართველოში ხდება. ჩვენ ძალიან შეშფოთებულები ვართ და ეს მკაფიოდ ვაცნობეთ ქართველებს. გვაქვს თანამშრომლობა მათთან. ვფიქრობ, რომ თანამშრომლობა თავისთავად ემსახურება მიზანს ახლა იმისთვისაც, რომ დავრწმუნდეთ, გვქონდეს არხი, რომლის საშუალებითაც შეგვეძლება ჩვენი წუხილის გამოხატვა".
