გერმანიის ელჩის გაწვევა საქართველოს პრორუს პრემიერ-მინისტრ ირაკლი კობახიძესა და პეტერ ფიშერს შორის ხანგრძლივი ესკალაციის კულმინაციაა, - ამის შესახებ გერმანული გამოცემა Der Spiegel გერმანიის საგარეო საქმეთა სამინისტროს გადაწყვეტილებასთან დაკავშირებით წერს.
"სექტემბრის შუა რიცხვებში კობახიძემ და პარლამენტის თავმჯდომარე შალვა პაპუაშვილმა ფიშერი დაადანაშაულეს ქვეყნის შიდა საქმეებში ჩარევაში და საჯაროდ განიხილეს ფიშერის გაძევება.
ამის ფონი ფიშერის მიერ საქართველოს მთავრობის სულ უფრო ავტორიტარული სტილის განმეორებითი საჯარო კრიტიკაა. სხვა საკითხებთან ერთად, დიპლომატს პრობლემები შეექმნა ოპოზიციური ფიგურების წინააღმდეგ მიმდინარე სასამართლო სხდომებზე დასწრების გამო. ფიშერს საქართველოს მთავრობა თვეების განმავლობაში აკრიტიკებდა ოპოზიციონერი პოლიტიკოსის სახლის დაქირავების შემდეგ. პაპუაშვილმა ოპოზიციონერი პოლიტიკოსი თაღლითობის მცდელობაში დაადანაშაულა, ფიშერი კი ირიბად ოპოზიციის დახმარებაში.
ფიშერი არ არის ევროკავშირის ერთადერთი წარმომადგენელი, რომელთანაც საქართველოს მთავრობას უთანხმოება აქვს. გასულ ხუთშაბათს, საქართველოს შინაგან საქმეთა სამინისტრომ ფინეთის საგარეო საქმეთა მინისტრი ელინა ვალტონენი დააჯარიმა მას შემდეგ, რაც მან მთავრობის საწინააღმდეგო საპროტესტო აქციებს სოლიდარობა გამოუცხადა. ვალტონენი სამხრეთ კავკასიის რესპუბლიკას ევროპაში უსაფრთხოებისა და თანამშრომლობის ორგანიზაციის (ეუთო) ამჟამინდელი თავმჯდომარის რანგში ეწვია...
2024 წლის შემოდგომაზე, კობახიძის პარტიამ „ქართულმა ოცნებამ“ სადავო საპარლამენტო არჩევნების შემდეგ გამარჯვება გამოაცხადა. როდესაც კობახიძემ შეაჩერა საქართველოს ევროკავშირში ინტეგრაცია, რაც კონსტიტუციით იყო გათვალისწინებული, და შეაჩერა ქვეყნის ევროკავშირში გაწევრიანების შესახებ მოლაპარაკებები, კვირების განმავლობაში მასობრივი საპროტესტო აქციები დაიწყო, ძირითადად თბილისსა და სხვა ქალაქებში. ოპოზიციამ პროტესტის ნიშნად უარი თქვა საპარლამენტო მანდატებზე", - წერს გამოცემა.
შეგახსენებთ, გერმანიამ საქართველოდან ელჩი პეტერ ფიშერი კონსულტაციებისთვის გაიწვია.
გერმანიის საგარეო უწყების მიერ გავრცელებულ განცხადებაში ნათქვამია: „უკვე რამდენიმე თვეა, საქართველოს ხელმძღვანელობა ევროკავშირის, გერმანიის და ასევე პირადად გერმანიის ელჩის, ფიშერის წინააღმდეგ აგიტაციას აწარმოებს. ამიტომ, საგარეო საქმეთა მინისტრმა, იოჰან ვადეფულმა მიიღო გადაწყვეტილება, ელჩი ფიშერი შემდგომ ქმედებებთან დაკავშირებით კონსულტაციებისთვის გაიწვიოს“.
როგორც ცნობილია, 20 ოქტომბერს, ევროკავშირის საგარეო საქმეთა საბჭო შეიკრიბება, რომელიც საქართველოს საკითხს განიხილავს.
