მოსკოვის მხატვრის საგამოფენო დარბაზში 1990-იან წლებში საქართველოდან გატაცებული ნიკო ფიროსმანის ტილო "შავი ლომი" აღმოჩნდა.
შედევრი სამხატვრო აკადემიის ყოფილი რექტორის აპოლონ ქუთათელაძის საკუთრება გახლდათ და მისი ვაჟის ყარამან ქუთათელაძის სახელოსნოში ინახებოდა.
ქუთათელაძეების ოჯახის თქმით, ტილო მათ ყაჩაღური გზით წაართვეს. 21 წლის შემდეგ კი "შავი ლომი" რუსეთში გამოიფინა.
ნამუშევრის რუსეთში მოხვედრის შესახებ ვერსიები საკმაოდ ბევრია. ქართველი სპეციალისტები ეჭვობენ, რომ 90-იან წლებში მოპარული ტილო საზღვარზე გაიტანეს და რუსეთში კერძო კოლექციონერს მიყიდეს. ამის შემდეგ კი ნამუშევარმა დღის სინათლე მოსკოვის საგამოფენო ცენტრში გამოფენისას ნახა.
სპეციალისტები არ გამორიცხავენ, რომ ეს ნამუშევარი ორიგინალი არ იყოს და მოსკოვში მისი ასლი ინახებოდეს.
შეგახსენებთ, ნიკო ფიროსმანის ეს ნამუშევარი ყველაზე ძვირადღირებულია. ფიროსმანის ნამუშევარი 1906 წელსაა შესრულებული. აღსანიშნავია, რომ "შავ ლომზე" საერთაშორისო ძებნა იყო გამოცხადებული.
