ე. წ. სამხრეთ ოსეთის პოსტკონფლიტური დარეგულირების მინისტრის მოადგილე მერაბ ჩიგოევი რეინტეგრაციის საკითხებში საქართველოს სახელმწიფო მინისტრის თემურ იაკობაშვილის განცხადებას ეხმაურება და აცხადებს, რომ ქართველი მინისტრი, როგორც ყოველთვის, სასურველს რეალურად წარმოაჩენს და "მისი ემოციური სიტყვები და დასკვნები დამყარებულია ხელისუფლებას დაქვემდებარებულ ქართულ მედიაზე". ეს განცხადება ჩიგოევმა იაკობაშვილის განცხადების კომენტირებისას გააკეთა, სადაც იაკობაშვილი აცხადებს, რომ არავითარი გაცვლა ვითომ დაკავებული ე. წ. სამხრეთ ოსეთის მოქალაქეებისა ქართველ მოზარდებზე არ მოხდება.
"კანონის დამრღვევთა გაცვლაზე საუბარიც არ შეიძლება. ეს ადამიანებია და არა საქონელი, რომლის გაცვლაც შეიძლება", _ აცხადებს ჩიგოევი და დასძენს, რომ "დაკავებული ახალგაზდების გათავისუფლება მთლიანად შედის სამხრეთ ოსეთის სამართალდამცავი ორგანოების კომპეტენციაში. მათ უნდა გადაწყვიტონ, გაათავისუფლონ ისინი თუ საქმე სასამართლოს გადასცენ. იმ შემთხვევაში, თუკი ისინი მიიღებენ გადაწყვეტილებას მათი გათავისუფლების შესახებ, ეს იქნება ჰუმანიტარული აქცია და არა იაკობაშვილის ხმამაღალი მოთხოვნების შედეგი".
"ის ტონი, რომლით საუბრის უფლებასაც აძლევს მინისტრი თავს, ხელს არ უწყობს არა მხოლოდ ზემოხსენებული მოზარდების გათავისუფლებას, არამედ ჩვენს სახელმწიფოებს შორის ნდობის აღდგენასაც, რომლის შესახებაც ასე ხმამაღლა საუბრობენ ქართველი მაღალჩინოსნები, მათ შორის ჟენევის დისკუსიებზე", _ აცხადებს ჩიგოევი.
