ეუთოს დემოკრატიული ინსტიტუტებისა და ადამიანის უფლებების ოფისი (ODIHR) საქართველოში მიმდინარე მოვლენებთან დაკავშირებით განცხადებას ავრცელებს.
ეუთო/ოდირის განცხადებით, საქართველოში მიღებული ახალი კანონმდებლობა, "რომელიც ზღუდავს სამოქალაქო უფლებებს, პოლიტიკურ უფლებებსა და გამოხატვის თავისუფლებას, სერიოზულ შეშფოთებას იწვევს".
"საქართველოში მიმდინარე საპროტესტო აქციებისა და დემოკრატიული და ადამიანის უფლებების გარემოს გაუარესების ფონზე, ეუთოს დემოკრატიული ინსტიტუტებისა და ადამიანის უფლებების ოფისი (ODIHR) ღრმა შეშფოთებას გამოთქვამს 4 მარტს დამტკიცებული ახალი საკანონმდებლო ცვლილებების გამო, რომლებიც სანქციებს უწესებს სამოქალაქო საზოგადოების ორგანიზაციებს და უცხოური დაფინანსების სხვა მიმღებებს, კრძალავს მათ პოლიტიკურ პარტიებში გაწევრიანებას და საჯარო თანამდებობებზე კენჭისყრას, კიდევ უფრო ზღუდავს სამოქალაქო საზოგადოებისთვის საერთაშორისო ფინანსურ დახმარებას და კრიმინალიზაციას უწევს იმ საქმიანობას, რომელიც მთავრობის „დელეგიტიმაციად“ ითვლება.
ახალი კანონმდებლობა უარყოფითად აისახება გამოხატვისა და გაერთიანების თავისუფლების უფლებებზე და მკვეთრად ზღუდავს პოლიტიკურ და საზოგადოებრივ მონაწილეობას. კანონის ფართო მასშტაბმა შესაძლოა გავლენა მოახდინოს არა მხოლოდ დამოუკიდებელ სამოქალაქო საზოგადოების ორგანიზაციებსა და ადამიანის უფლებათა დამცველებზე, არამედ ცალკეულ ექსპერტებზე, კონსულტანტებზე ან მომსახურების მიმწოდებლებზეც.
მკაცრი სისხლისსამართლებრივი სასჯელები, ასევე ფართოდ და ბუნდოვნად განსაზღვრული ტერმინები, როგორიცაა „მასობრივი დაუმორჩილებლობა“ ან „ექსტრემიზმი“, რომლებიც შეიძლება სისხლისსამართლებრივი დევნის საფუძველი გახდეს, არ შეესაბამება კანონის უზენაესობის სტანდარტებს სამართლებრივი დარწმუნებულობისა და პროგნოზირებადობის შესახებ და ქმნის თვითნებური აღსრულების რისკს. ნებისმიერი უცხოური დაფინანსების კრიმინალიზაცია მთავრობის წინასწარი ნებართვის გარეშე, ექვს წლამდე თავისუფლების აღკვეთით, არაპროპორციული ზომაა, რომელიც ხელს შეუშლის მთავრობისთვის კრიტიკულად განწყობილი სამოქალაქო საზოგადოების ორგანიზაციების მუშაობას.
ეუთოს ყველა სახელმწიფომ აღიარა სამოქალაქო საზოგადოების მნიშვნელობა წარმატებული დემოკრატიისთვის. მათ ასევე აიღეს ვალდებულება, პატივი სცენ პოლიტიკური პარტიების შექმნის უფლებას და უზრუნველყონ გარანტიები, რათა მათ შეძლონ ერთმანეთთან კონკურენცია თანაბარი მოპყრობის საფუძველზე.
ოფისი კვლავ სთავაზობს დახმარებას საქართველოს, რათა უზრუნველყოს კანონების შესაბამისობა დემოკრატიულ საერთაშორისო სტანდარტებთან და ყველა მოქალაქის ადამიანის უფლებების დაცვა," - წერია განცხადებაში.
