რუსეთის პრეზიდენტმა ვლადიმირ პუტინმა ირანის პრეზიდენტ მასუდ ფეზეშქიანთან სატელეფონო საუბარი გამართა. ეს მათი პირველი კონტაქტია აშშ-ისრაელის ომის დაწყების შემდეგ.
კრემლის პრესსამსახურის ცნობით, პუტინმა ღრმა მწუხარება გამოთქვა ირანის უზენაესი ლიდერის, აიათოლა ალი ხამენეის, ირანის ხელმძღვანელობის სხვა წევრებისა და მშვიდობიანი მოსახლეობის დაღუპვის გამო, „ირანის წინააღმდეგ ისრაელ-ამერიკის შეიარაღებული აგრესიის შედეგად“.
მან მოუწოდა ახლო აღმოსავლეთში არსებული პრობლემების გადასაჭრელად ძალის გამოყენების შეწყვეტისა და სამშვიდობო მოლაპარაკებების დაბრუნებისკენ.
„დადასტურდა რუსეთის პრინციპული პოზიცია საომარი მოქმედებების დაუყოვნებლივ შეწყვეტის, ირანისა და მთელი ახლო აღმოსავლეთის გარშემო არსებული პრობლემების გადაჭრის ძალისმიერი მეთოდების გამოყენებისგან უარის თქმისა და პოლიტიკური და დიპლომატიური მოგვარების გზაზე სწრაფი დაბრუნების აუცილებლობის შესახებ“, - ნათქვამია კრემლის განცხადებაში.
კრემლის ცნობით, ფეზეშქიანმა პუტინს მადლობა გადაუხადა რუსეთის მიერ ირანელი ხალხის მიმართ გამოვლენილი სოლიდარობისთვის. მან დეტალურად მიაწოდა ინფორმაცია მიმდინარე მოვლენების შესახებ. მხარეები შეთანხმდნენ დიალოგის გაგრძელებაზე. რუსეთის პრეზიდენტმა ასევე აღნიშნა, რომ ის მუდმივ კონტაქტზეა სპარსეთის ყურის თანამშრომლობის საბჭოს ქვეყნების ლიდერებთან.
