ევროსაბჭოს საპარლამენტო ასამბლეის, გენდერული თანასწორობის და უმცირესობის უფლებების ქვეკომიტეტების სხდომაზე, რომელსაც გენდერული თანასწორობის ქვეკომიტეტის თავმჯდომარის მოადგილე გუგული მაღრაძე თავმჯდომარეობდა მრავალჯერადი დისკრიმინაციის საკითხებზე იმსჯელეს. პარლამენტის ინფორმაციით, საკითხი აქტუალურია სტამბოლის კონვენციის კონტექსტში. სხდომაზე დეპუტატებმა რამდენიმე ექსპერტის მოხსენება მოისმინეს და საკითხის ირგვლივ დისკუსია გამართეს.
პროფესორმა ტოვი მალოუმ, ნაციონალური უმცირესობების ჩარჩო კონვენციის მრჩეველთა კომიტეტის წევრმა, თავის პრეზენტაციაში მიმოიხილა ის სამართლებრივი მექანიზმები და რეგულაციები, რომლებიც ევროსაბჭოს აქვს შემუშავებული მრავალმხრივი დისკრიმინაციის წინააღმდეგ და განსაკუთრებით გაუსვა ხაზი ამ რეგულაციების განხორციელების მნიშვნელობას, რისთვისაც ევროსაბჭოს შესაბამისი გაიდლაინები აქვს შემუშავებული.
გუგული მაღრაძემ თავის გამოსვლაში აღნიშნა, რომ საქართველოში მონიტორინგს ამ საკითხებზე პარლამენტის შესაბამისი კომიტეტები და გენდერული თანასწორობის საბჭო ახორციელებს, ასევე სახალხო დამცველის ოფისი და არაერთი არასამთავრობო ორგანიზაცია, რომელთაც დიდ დახმარებას გაუწევს ასეთი გაიდლაინები.
სხდომის მონაწილეებმა მოისმინეს ინფორმაცია ნორვეგიის ერთ-ერთი ეთნიკური უმცირესობის (სეამი) თაობაზე. მათ თავისი პარლამენტი აქვთ, სადაც დაცულია გენდერული თანასწორობა.
რუმინეთში ბოშა ქალების და გოგონების უფლებების ცენტრის პრეზიდენტის, განცხადებით, ევროსაბჭოს რამდენიმე ქვეყნის კანონმდებლობაში არის მნიშვნელოვანი ხარვეზი, რომ ადრეული ქორწინება არ განიხილება, როგორც სისხლის სამართლის დანაშაული, რასაც მოითხოვს სტამბულის კონვენცია. ამასთან დაკავშირებით გუგული მაღრაძემ სხდომის მონაწილეებს გააცნო ის ცვლილებები, რაც საქართველოს კანონდებლობაში სტამბოლის კონვენციასთან ჰარმონიზაციის მიზნით განხორციელდა და დააყენა წინადადება, რომ კომიტეტის ფორმატში მოეწყოს შეხვედრა გენდერული თანასწორობის საკითხებზე, სადაც თითოეული წევრიქვეყანა წარმოადგენს თუ რა დონეზეა მათ ქვეყანაში სტამბულის კონვენციასთან მიმართებაში პროგრესი. ეს წინადადება გაზიარებული იქნა დამსწრეთა მიერ და გადაეცა კომიტეტის აპარატს განსახილველად.
