სუპერმარკეტ „სპარის“ ორი თანამშრომლის მიმართ განხორციელებულ ჯგუფურ ძალადობაში მონაწილეებიდან ერთ-ერთი მომღერალ მამუკა ჩარკვიანის შვილი, ჯაკო (ჯანსუღ) ჩარკვიანია.
გამოძიების ცნობით, ის იმ თავდამსხმელებს შორის იყო, რომელებიც თბილისში, სუპერმარკეტ "სპარში" მანანა გიორგობიანის თხოვნით მივიდა და 19 და 21 წლის კონსულტანტებს ფიზიკურად გაუსწორდა.
ჩარკვიანის მამიდა, თაკო ჩარკვიანი ამბობს, რომ მის ძმისშვილს მანანა გიორგობიანმა დაურეკა და შველა სთხოვა.
ჯანუკას, გარდაცვლილი მეგობრის დედამ დაურეკა - მცემენო. ვიდეოში [შსს-ს მიერ გავრცელებულ კადრებში] ისმის კიდეც რომ ეს ქალი [მანჩო გიორგობიანი] ამბობს, რომ დავურეკავო. როგორც მე გავიგე, დაურეკა.
ეს ქალი მანამდე ჩხუბობს და შემდეგ როგორც ჩანს ურეკავს - "მცემენ, მომეშველე".
ძალიან მეცოდება ჯანუკი, ძალიან კარგი ბიჭია, როგორ აგიხსნათ ხალხო - ძალიან მებრალება. მკვდარი მეგობრის დედა რომ დაგირეკავს - მცემენო, ალბათ, ჩახვალ. შვილის ტოლა ბიჭს როგორ უნდა დაურეკო?! არ არის ეს ნორმალური. კონსულტანტთან მოუვიდა ამ ქალს [მანჩო გიორგობიანს ჩხუბი]. ცოდვაა ამ საქმისთვის ახალგაზრდა კაცი რომ დაისაჯოს"- უთხრა TV პირველს თაკო ჩარკვიანმა.
ცნობისთვის, 2 ნოემბერს, გვიან ღამით, სუპერმარკეტ „სპარში“ ორ თანამშრომელს ფიზიკურად გაუსწორდნენ. სამართალდამცავებმა ჯგუფური ძალადობის ორგანიზებისა და მასში მონაწილეობის ფაქტზე მანანა გიორგობიანი დააკავეს.
შსს-ს ცნობით, მანანა გიორგობიანი დაუკავშირდა ჯაკო ჯანსუღ ჩარკვიანს, რომელიც ადგილზე თანმხლებ პირებთან ერთად მივიდა, რა დროსაც მათ, სუპერმარკეტის ორი თანამშრომელი ძალის გამოყენებით გაიყვანეს გარე ტერიტორიაზე და ჯგუფურად ფიზიკურად გაუსწორდნენ.
გამოძიება საქართველოს სისხლის სამართლის კოდექსის 225-ე და 126-ე მუხლებით მიმდინარეობს, რაც ჯგუფურ ძალადობას და ჯგუფური ძალადობის ორგანიზებას გულისხმობს.
