მომღერალ გია გაჩეჩილაძის ("უცნობის") განცხადებით, ოპოზიციამ ხალხის ერთადერთი დაკვეთა - თბილისის მერის არჩევნებში ერთიანი კანდიდატით მიეღო მონაწილეობა, ვერ შეასრულა.
აღნიშნულის გამო "უცნობი" ოპოზიციურ პოლიტიკურ ძალებს აკრიტიკებს და შეახსენებს, რომ "ხალხი კი არაა მათი შემადგენელი ნაწილი (რომელიც, როცა დაუძახებ, მაშინ გამოვა), არამედ პირიქით".
"როცა ამდენი პროტესტის შემდეგ ხალხმა მხოლოდ ერთადერთ შედეგს მიაღწია, რასაც თბილისის მერის არჩევნები ჰქვია და ისიც ხელიდან ეცლება (რადგან ოპოზიციამ მათი ერთადერთი დაკვეთა - ერთიანი კანდიდატითYმიეღო მონაწილეობა არჩევნებში, ვერ შეასრულა), პირადად მე შეურაცხყოფილი ვარ.
ის ყველაფერი, რაც დღეს ხდება, ცირკია. ცირკის ჩვენება კი როგორ უნდა, ხელოვანზე უკეთ არავინ იცის", - განაცხადა "უცნობმა" ტელეკომპანია "კავკასიის" ეთერში, თოქ-შოუ "ბარიერში" სტუმრობისას.
ამასთან, ის მერობის კანდიდატების საარჩევნო პროგრამებსა და პრიორიტეტებსაც აკრიტიკებს და აცხადებს, რომ მათთვის მთავარი არა დენის და წამლის გაიაფება, არამედ ქალაქში გამეფებული "საგადასახადო კოშმარისა" და "პოლიციური სტრუქტურის" შეცვლა უნდა იყოს.
"მივესალმები ყველას, ვინც წამალს თუ დენს აიაფებს, მაგრამ მიმაჩნია, რომ პირველ რიგში იმ საგადასახადო კოშმარს და უბედურებას უნდა ააცილო საკუთარი მოქალაქეები, რაც თბილისში ხდება - ეს უნდა იყოს მთავარი. კანდიდატები უნდა იძახდნენ, რომ შეცვლიან ჩვენი ქალაქის პოლიციას, რომ არავინ ხელი აღარ ახლოს ჩვენს დედაქალაქელებს... მე მერობის ასეთი კანდიდატი მინდოდა", - განმარტავს გია გაჩეჩილაძე.
