საქართველოში ეროვნულ უმცირესობებთან ინტეგრაცია სახელმწიფოს არასწორი პოლიტიკით ფერხდება. ამის შესახებ "ჯი-ეიჩ-ენს" სახალხო დამცველის აპარატთან არსებული იურიდიული საბჭოს წევრმა, აზერბაიჯანული დიასპორის წარმომადგენელმა ფახრად მურაევმა განუცხადა.
"საქართველოში მცხოვრები ეთნიკური უმცირესობის ინტეგრაცია მანამდე არ მოხდება, სანამ მათ სახელმწიფო ენა არ ეცოდინებათ. ამიტომ ამ ეტაპზე საუბარი უფლების დაცვის საკითხებზე ზედმეტია, რადგან მათ ელემენტარულად არც კანონები და არც საკუთარი უფლების შესახებ არაფერი არ იციან. 20 წელია ვითხოვთ, რომ ეთნიკური უმცირესობისთვის სახელმწიფო ენის შესწვალა სავალდებულო გახდეს, რაზეც ხელისუფლებისგან არაერთი დაპირება მივიღეთ, თუმცა დღემდე ეს მხოლოდ დაპირებად რჩება", - აღნიშნა ფარხად მურაევმა.
მისივე განმარტებით, სახელმწიფო პროგრამა, რომელიც ეთნიკური უმცირესობისთვის ქართული ენის სწავლებას ითვალისწინებს არაეფექტურია და სახელმწიფოს მხრიდან "ტყუილად გაღებული ხარჯია".
"ქვემო ქართლში, სადაც არც ერთი სიტყვა ქართულად არ იციან ჩადიან ქართული ენის მასწავლებელი, რომლებმაც მხოლოდ ქართული იციან. ამიტომ ადგილობრივ მოსახლება ვერ სწვალობს სახელმწიფო ენას. წარმოიდგინეთ ეს იგივეა, რომ ინგლისური ენის პედაგოგი ქართულ სკოლაში შევიდეს, რომელმაც ქართული საერთოდ არ იცის. ასეთი არასწორი მიდგომის შედეგად კი სახელმწიფო მხოლოდ უშედეგო ხარჯს წევს", - აღნიშნა მან და აქვე დასძინა, რომ ამ ვითარებიდან გამოსავალია, რომ გადამზადდეს ისეთი პედაგოგები, რომლებიც როგორც ქართულ ასევე აზერბაიჯანულ ენებს ფლობენ.
"აზერბაიჯანული ენის ცოდნის შემთხვევაში პედაგოგს მოსწავლეებთან ურთიერთობა გაუადვილდება და მათთვისაც გასაგები გახდება რას ასწავლიან. თუ ეს არ მოხდა ჩათვალეთ, რომ ეთნიკური უმცირესობის ინტეგრაცია ქვეყანაში შეუძლებელი გახდება",- აღნიშნა აზერბაიჯანული დიასპორის წარმომადგენელმა.
