საქართველოს პარლამენტში, თავდაცვისა და უშიშროების კომიტეტის თავმჯდომარე ირაკლი სესიაშვილის და საქართველოს სახალხო დამცველი უჩა ნანუაშვილის შეხვედრა შედგა, რომელიც საქართველოს სახალხო დამცველის აპარატში ახლად გახსნილი დეპარტამენტის სამომავლო საქმიანობის საკითხს ეხებოდა.
სახალხო დამცველის ოფისში აღნიშნული დეპარტამენტი დაახლოებით ერთი თვეა რაც შეიქმნა და იგი სამხედროებისა და გასამხედროებულ სახელმწიფო სამსახურებში მომუშავე პირთა უფლებების დაცვაზე იქნება ორიენტირებული.
საქართველოს სახალხო დამცველის აპარატში სამხედროების უფლებათა დაცვის სამსახურს თამარ გაბიანი უხელმძღვანელებს, რომელიც ასევე მონაწილეობდა დღევანდელ შეხვედრაში. შეხვედრას ასევე ესწრებოდა სახალხო დამცველის მოადგილე ნათია კაციტაძე.
პარალემნტის ინფორმაციით, შეხვედრა გაცნობითი ხასიათის იყო. ისაუბრეს იმ გამოწვევებზე, რაც ზემოაღნიშნულ სფეროში ადამიანის უფლებათა მდგომარეობის კუთხით არსებობს, ასევე დაგეგმეს კონკრეტული გეგმები იმისათვის, რომ სახალხო დამცველის ოფისსა და პარლამენტის თავდაცვისა და უშიშროების კომიტეტს შორის თანამშრომლობა უფრო ნაყოფიერი და სისტემატური იყოს.
როგორც სახალხო დამცველმა აღნიშნა, ადამიანის უფლებების თვალსაზრისით ვითარება ჯარშიც და პოლიციაშიც მნიშვნელოვნად შეიცვალა უკეთესობისაკენ, თუმცა მხარეები მიიჩნევენ, რომ აღნიშნულ სფეროში ადამიანის უფლებების დაცვა ეს არის მუდმივი პროცესი და მუდმივად უნდა იყოს ვინმე ამ უფლებების დაცვის სადარაჯოზე, და ამ კუთხით, სახალხო დამცველის აპარატში სპეციალური დეპარტამენტის შექმნა მართლაც რომ მნიშვნელოვანია.
თავის მხრივ, ირაკლი სესიაშვილმა ახლად შექმნილი სამსახურის ხელმძღვანელს, მთლიანად სახალხო დამცველის აპარატს თანამშრომლობა აღუთქვა.
„ჩვენ, ძირითადად, სისტემურ საკითხებზე ვისაუბრეთ. მივესალმები ბატონ უჩა ნანუაშვილის გადაწყვეტილებას, რომ შეიქმნა დეპარტამენტი სახალხო დამცველის ოფისში, რომელიც უშუალოდ იქნება ორიენტირებული უსაფრთხოების სექტორის პერსონალის უფლებების დაცვაზე. შევთანხმდით იმაზეც, რომ აქ მხოლოდ უფლებების დაცვაზე არ უნდა იყოს აქცენტი გაკეთებული, ასევე უნდა განხორციელდეს მუშაობა და კვლევა იმაზეც, თუ რა ინტერესები აქვთ ამ ჯგუფებს, იმდენად, რამდენადაც ვიცით, რომ უსაფრთხოების სექტორის პერსონალის გარკვეული სამოქალაქო უფლებები კონსტიტუციით შეზღუდულია, როგორიცაა პოლიტიკურ აქტივობებში ჩაბმა, გაფიცვა, დემონსტრაციებში მონაწილეობა. ამიტომ, მათ უნდა ჰქონდეს გარკვეული საშუალება იმისათვის, რომ საკუთარი ინტერესები საზოგადოებას უფრო ადვილად გააცნონ და ამ მიმართულებით სახალხო დამცველმა ძალიან აქტიურად უნდა იმუშაოს, ჩვენი მხრიდან კი თანამშრომლობისთვის მზად ვართ“, - განაცხადა შეხვედრის შემდეგ თავდაცვისა და უშიშროების კომიტეტის თავმჯდომარემ ირაკლი სესიაშვილმა.
