BBC -ის მუსიკალური ჟურნალი „Music” ბათუმის შესახებ სტატიას აქვეყნებს სათაურით „ძირეული ცვლილებები შავ ზღვაზე- ბათუმი: საქართველო“. (Major Changes by the Black Sea -Batumi:Georgia”).
თავად სტატია ბათუმს და შავი ზღვის ამ ულამაზეს ქალაქში დაარსებულ მუსიკალურ ფესტივალს ეძღვნება. ევროპული მუსიკალური ფესტივალის ”Music Fest”-ის დამკვიდრებას აჭარის ა/რ მთავრობის მხარდაჭერით ევროპაში მოღვაწე ცნობილმა ქართველმა პიანისტმა ელისო ბოლქვაძემ შეუწყო ხელი. პიანისტს თავისი ბავშვობა ბათუმში აქვს გატარებული, ამიტომაც ამ ქალაქის მიმართ განსაკუთრებული დამოკიდებულება გააჩნია. „თანამედროვე ბათუმში უკვე მრავლადაა 5 ვარსკვლავიანი სასტუმროები, მრავალსართულიანი შენობები. ქალაქი ცხოვრებას განახლებული ძალით იწყებს, იგი ღიაა ყველასთვის ვისაც სურს აქ თანამედროვე ტიპის დასავლურ ღირებულებებზე დაფუძნებული ბიზნეს ურთიერთობები წამოიწყოს...მზარდი ეკონომიკა და შთამბეჭდავი ახალი შენობები საბჭოთა წარსულს შორეულ მოგონებებში ტოვებს. ამ ულამაზეს ქართულ ქალაქს დღეს აქვს ამბიცია იყოს კულტურული ცენტრი“ წერს სტატიის ავტორი ოლივერ კანდი.
სტატიაში წინასწარ არის მოწოდებული ინფორმაცია 2015 წლის ფესტივალის პროგრამის შესახებ. კლასიკური მუსიკის ფესტივალს უდიდესი მნიშვნელობა ენიჭება ტურიზმის მიმართულებითაც. იგი ხელს უწყობს საქართველოს დადებითი სახით წარმოჩენას საერთაშორისო არენაზე.
გთავაზობთ სტატიის თარგმანს:
„ძირეული ცვლილებები შავ ზღვაზე- ბათუმი : საქართველო“
„მზარდი ეკონომიკა და შთამბეჭდავი ახალი შენობები საბჭოთა წარსულს შორეულ მოგონებებში ტოვებს. ამ ულამაზეს ქართულ ქალაქს დღეს ამბიცია აქვს იყოს კულტურული ცენტრი“ - წერს ჟურნალისტი ოლივერ კანდი.
სტატია იწყება პროლეტარიატის ქართველი ბელადის იოსებ სტალინის ბათუმში ყოფნის აღწერით, სადაც მან რამდენიმე თვე დაჰყო და და რამდენიმე გაფიცვის და არალეგალური სტამბის დაარსების ორგანიზებაში მიიღო მონაწილეობა.
პარალელურად აღწერილია ქალაქის სხვადასხვა ღირშესანიშნაობები,მუზეუმები (მათ შორის სტალინის, რომელიც დღეს უკვე აღარ არსებობს), ბათუმის უბნები და მათი განვითარების ისტორია XIX-XX საუკუნეებში და დღემდე.
აღსანიშნავია, რომ თანამედროვე ბათუმში უკვე მრავლადაა 5 ვარსკვლავიანი სასტუმროები, მრავალსართულიანი შენობები. ქალაქი ცხოვრებას განახლებული ძალით იწყებს, იგი ღიაა ყველასთვის ვისაც სურს ბათუმში თანამედროვე ტიპის დასავლურ ღირებულებებზე დაფუძნებული ბიზნეს ურთიერთობები წამოიწყოს. გამომდინარე აქედან ქალაქი მზადაა დასავლური სტილის კულტურული ღონისძიებების მასპინძელი იყოს. ერთ-ერთი ასეთი ღონისძიების სულისჩამდგმელია სწორედ ქართველი პიანისტი ელისო ბოლქვაძე.
ბათუმის მუსიკალური ფესტივალი, რომელიც ელისო ბოლქვაძის სახელთანაა დაკავშირებული ყოველწლიურად მარმარილოსა და მინის ნეოკლასიკური სტილით ნაგებ 1100 კაციან სახელმწიფო მუსიკალურ ცენტრში იმართება.
გასულ წლის ფესტივალის სახელს უკავშირდება ისეთი მჟღერი სახელები როგორებიცაა: ფრანგი მევიოლინე და რეჟისორი ბრუნო მონსენჟონი და ამერიკელი დირიჟორი ლოურენს გოლანი, რომელიც დენვერის ფილარმონიის ორკესტრის მუსიკალური ხელმძღვანელია. გოლანი დირიჟორობდა ბათუმის სიმფონიურ ორკესტრს გახსნით კონცერტზე, მათ შეასრულეს გერშვინის ცნობილი ნაწარმოები„An American in Paris”, პროკოფიევის N1 საფორტეპიანო კონცერტი. ელისო ბოლქვაძის მონაწილეობით ასევე შესრულდა ქართველი კომპოზიტორის რევაზ ლაღიძის მიერ 1953 წელს შექმნილი ნაწარმოები „საჭიდაო“, რომელიც მსმენელისთვის კარგად იყო ნაცნობი და მისი საფინალო აკორდები მსმენელთა მხურვალე ოვაციებით დასრულდა.
„ეს იყო ჩემი ოცნება, რომ ქართველი კომპოზიტორების შემოქმედება ფესტივალზე წარმოდგენილი ყოფილიყო და მათ უცხოელები გასცნობოდნენ“ - აღნიშნა ელისო ბოლქვაძემ. „ასევე მინდა მონაწილეობა მივიღო პროექტში, რომელიც ქართულ ფოლკლორთან და ცეკვებთან იქნება დაკავშირებული, მაგრამ ფესტივალი უპირველესად დასავლურ კლასიკურ მუსიკაზეა.“
ახალგაზრდა ტალანტების აღმოჩენაც ელისო ბოლქვაძის გეგმების უმთავრესი ნაწილია. ის არის ფონდ „ლირას“ დამფუძნებელი, რომელიც ხელს უწყობს ახალგაზრდა ქართველი ტალანტების წარმოჩინებას. ბათუმის მუსიკალური ფესტივალის ფარგლებში ელისო ბოლქვაძე ახალგაზრდებს მასტერკლასებს უტარებს ბათუმის მუსიკალურ სკოლაში, რომელიც ზ.ფალიაშვილის სახელს უკავშირდება და აღიარებულია, როგორც ქართული კლასიკური მუსიკის ფუძემდებლად. მასტერკლასების შემდგომ შეირჩევა სამი ნიჭიერი ახალგაზრდა, რომლებიც საფინალო გალა კონცერტზე პარიზსა და ამსტერდამში წარსდგებიან აუდიტორიის წინაშე. ეს არის ერთ-ერთი საშუალება იმისა, რომ ელისო ბოლქვაძემ გვიჩვენოს თუ როგორ ცოცხლობს და ვითარდება საქართველოში კლასიკური მუსიკა.
„ძალიან რთულია დაფინანსების მოპოვება, ჩემთვის მნიშვნელოვანია ყველას ავუხსნა თუ რაოდენ საჭიროა ეს ფესტივალი საქართველოს საერთაშორისო იმიჯისთვის, ტურიზმის განვითარებისთვის. ყველა კულტურული ღონისძიება მთავრობის მიერ ფინანსდება, შესაბამისად, მე მიწევს ურთიერთობა მინისტრებთან, რაც ყოველთვის არ არის ადვილი, მაგრამ მე განწყობილი ვარ საიმისოდ, რომ ფესტივალი იყოს მაღალი დონის და გახდეს კიდევ უფრო პოპულარული“.
ბათუმის მეოთხე მუსიკალური ფესტივალის ძირითადი პროგრამა
ბათუმის 2015 წლის მუსიკალური ფესტივალის ფარგლებში კლასიკური მუსიკის სცენაზე გაიმართება:
გახსნითი კონცერტი
წარმოდგენილი იქნებიან: პიანისტი და ბათუმის მუსიკალური ფესტივალის ხელმძღვანელი ელისო ბოლქვაძე და ფრანგი კომპოზიტორი და დირიჟორი ლორან პეტიჟირარდი.
ფრანსუა -ფედერიკ გი
11 სექტემბერი- შესანიშნავი ფრანგი პიანისტი წარმოგვიდგენს ბეთჰოვენის N2 საფორტეპიანო კონცერტს, თბილისის სახელმწიფო ოპერის სიმფონიურ ორკესტრთან ერთად დავით კინწურაშვილის დირიჟორობით.
მიჩი საგიერა
აღიარებული ამერიკელი მევიოლინე, დედოფალ ელისაბედის პრიზის მფლობელი და იაპონიის საერთაშორისო კონკურსის მონაწილე.
საზეიმო დახურვა
ფესტივალის გალა კონცერტი გაიმართება ბათუმის ულამაზეს „პიაცას“ მოედანზე. კონცერტი იქნება ქართული მუსიკისა და ცეკვის და დასავლური კლასიკური მუსიკის ერთგვარი სინთეზი.
