საქართველო პოსტსაბჭოთა სივრცეში საუკეთესო ჯადაცვის სისტემას ქმნის. ამის შესახებ საქართველოს პრეზიდენტმა მიხეილ სააკაშვილმა ხონის რაიონში ახალი საავადმყოფოს გახსნისას განაცხადა.
"ჩვენ ვქმნით ყოფილ პოსტსაბჭოთა სივრცეში ყველაზე მაგარ ჯანდაცვის სისტემას. ეს პირველ რიგში ეფუძნება იმას, რომ ყველაფერი უნდა იყოს ძალიან თანამედროვე. აქედან ადამიანების უმეტესობა დადიოდა თბილისში. ამას შემოაქვს თანასწორობა რეგიონებს შორის. დღეს რეგიონში ცხოვრება უკვე აღარ არის დაკავშირებული მეორეხარისხოვან მოქალაქეობასთან, რადგან განათლებისა და ჯანდაცვის სისტემა გვაქვს უმაღლესი კლასის. ახლა მთავარია მაღალკვალიფიციური სპეციალისტები, ამიტომ, მეორე ეტაპია სპეციალისტების გადამზადება", - განაცხადა მიხეილ სააკაშვილმა.
ახალი საავადმყოფო 20-საწოლიანია, ულტრათანამედროვე ტექნიკითაა აღჭურვილი და მასში შესაძლებელია, ჰოსპიტალური, ამბულატორიული და პრე-ჰოსპიტალური პროცედურების გავლა. ხონის საავადმყოფოში სამედიცინო პერსონალი ადგილობრივი კადრებით არის დაკომპლექტებული. ხონის ახალი საავადმყოფო ჰოსპიტარული სექტორის განვითარების პროექტის ფარგლებში აშენდა.
