საქართველოს საგარეო საქმეთა სამინისტრო ეხმიანება ელექტრონულ მასმედიაში გავრცელებული ინფორმაციას, რომლის მიხედვითაც რუსეთი განაგრძობს მის მიერ ოკუპირებულ საქართველოს ტერიტორიის განუყოფელ ნაწილებში - აფხაზეთსა და ცხინვალის რეგიონში - განლაგებული საოკუპაციო ჯარების გაძლიერებას ახალი სამხედრო ტექნიკით. საგარეო უწყება ადასტურებს აღნიშნულ ინფორმაციას და აცხადებს, რომ ამის დასტურია ოკუპირებულ აფხაზეთში დისლოცირებული ე.წ. მე-7 სამხედრო ბაზაზე, ახალი ტიპის Т-90А ტანკებისა და სხვა შეტევითი სამხედრო ტექნიკის შეყვანა და განლაგება.
"რუსეთის მიერ განხორციელებული ეს უკანონო ქმედებები კიდევ ერთხელ ცხადყოფს, რომ რუსეთის ფედერაცია არ აპირებდა და არც აპირებს შეასრულოს ნაკისრი საერთაშორისო ვალდებულებები, მათ შორის ცეცხლის შეწყვეტის შესახებ 2008 წლის 12 აგვისტოს შეთანხმება. საქართველოს ოკუპირებული ტერიტორიების გამალებული მილიტარიზაცია ასევე ეწინააღმდეგება ევროპაში ჩვეულებრივი შეიარაღებული ძალების შესახებ (ეჩშძ) ხელშეკრულებით დადგენილ მოთხოვნებს.
ცხადია, რომ რუსეთის მიერ ეჩშძ ხელშეკრულების შესრულების შეჩერების თაობაზე გაკეთებული არალეგიტიმური განცხადება განპირობებული იყო ეჩშძ ხელშეკრულების მოქმედების არეალში სამხედრო ძალისა და ტექნიკის უკონტროლო ზრდის მისწრაფებით. ქართულმა მხარემ არაერთხელ გაამახვილა საერთაშორისო თანამეგობრობის ყურადღება ამ საკითხთან დაკავშირებით. რუსეთის ეს ქმედება, რომლებიც ეწინააღმდეგება საერთაშორისო სამართლის საყოველთაოდ აღიარებულ ნორმებსა და პრინციპებს, და მის მიერ ნაკისრ საერთაშორისო ვალდებულებებს, სერიოზულ საფრთხეს უქმნის მშვიდობასა და სტაბილურობას არა მხოლოდ კავკასიის რეგიონში, არამედ მთლიანად ევროპაში", - აღნიშნულია საგარეო საქმეთა სამინისტროს განცხადებაში.
განცხადების თანახმად, "რუსეთის ტრადიციული აგრესიული პოლიტიკის კონტექსტში უნდა იქნას განხილული სხვადასხვა მაღალჩინოსნების განცხადებებიც თითქოსდა საქართველოს მხრიდან მოსალოდნელი სამხედრო პროვოკაციების შესახებ, რის თვალსაჩინო მაგალითსაც წარმოადგენს რუსეთის გენერალური შტაბის მთავარი სადაზვერვო სამმართველოს უფროსის ალექსანდრე შლიახტუროვის ბოლო გამონათქვამები".
"ასეთი განცხადებების მიზანი ნათელია: საკუთარი აგრესიული განზრახვებისა და ქმედებების შენიღბვა და დანაშაულებრივი პოლიტიკის გადაბრალება მეზობელ ქვეყნებზე. საქართველო გამოხატავს თავის მკაცრ პროტესტს რუსეთის ამ უპასუხისმგებლო და ავანტიურულ ნაბიჯებთან დაკავშირებით და მოითხოვს რუსეთისგან ოკუპირებული რეგიონების მილიტარიზაციის შეწყვეტას და დეოკუპაციის პროცესის დაუყოვნებლივ დაწყებას", - აღნიშნულია განცხადებაში.
