სადაც უთანასწორობა და დისკრიმინაცია არსებობს, დემოკრატია ვერ ძლიერდება. თანასწორობა არ არის არჩევითი - ის თავისუფალი და მდგრადი საზოგადოებების საფუძველია, - ამის შესახებ ნათქვამია განცხადებაში, რომელსაც ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, კაია კალასი ავრცელებს.
სადაც უთანასწორობა და დისკრიმინაცია არსებობს, დემოკრატია ვერ ძლიერდება. თანასწორობა არ არის არჩევითი - ის თავისუფალი და მდგრადი საზოგადოებების საფუძველია.
მიუხედავად ამისა, მსოფლიოს მასშტაბით ლგბტი პირები კვლავაც ხშირად ხდებიან ძალადობის, დისკრიმინაციის, სიძულვილის ენისა და სტიგმატიზაციის სამიზნე, ასევე მიზანმიმართული დეზინფორმაციული კამპანიების ობიექტი მხოლოდ მათი იდენტობის გამო. როდესაც ლგბტი ადამიანების უფლებების სრული რეალიზება იზღუდება, საზოგადოების მონაწილეობა მცირდება და საზოგადოებები ნაკლებად ინკლუზიური და ნაკლებად დემოკრატიული ხდება.
ჰომოფობიის, ბიფობიისა და ტრანსფობიის წინააღმდეგ ბრძოლის საერთაშორისო დღეს (IDAHOT), ევროკავშირი კიდევ ერთხელ ადასტურებს თავის მტკიცე ერთგულებას — უზრუნველყოს ლგბტი პირებისთვის ყველა ადამიანის უფლების სრული და თანასწორი სარგებლობა.
ჩვენ დღეს ვხედავთ უნივერსალური ადამიანის უფლებების წინააღმდეგ გლობალურ უკუსვლას. დისკრიმინაცია ძლიერდება, მათ შორის სექსუალური ორიენტაციისა და გენდერული იდენტობის საფუძველზე. 65 ქვეყანაში კვლავ კრიმინალიზებულია ერთნაირსქესიან პირთა თანხმობითი ურთიერთობები, რაც საერთაშორისო ადამიანის უფლებათა სამართლის აშკარა დარღვევაა. ეს უნდა დასრულდეს. ევროკავშირი მოუწოდებს ყველა სახელმწიფოს გააუქმოს კანონები, რომლებიც კრიმინალიზებას ახდენს ერთნაირსქესიან თანხმობით ურთიერთობებზე და შეწყვიტოს ახალი დისკრიმინაციული კანონმდებლობის მიღება, რომელიც ლგბტი პირებს მიზანში იღებს.
ყველა ქვეყანამ უნდა გადადგას აუცილებელი ნაბიჯები იმისთვის, რომ ადამიანებმა შეძლონ საკუთარი ცხოვრების თავისუფლად, შიშისა და დევნის გარეშე წარმართვა.
ევროკავშირი მტკიცედ ეწინააღმდეგება ყველა ფორმის დისკრიმინაციას. თანასწორობა ასევე გათვალისწინებულია მის დამფუძნებელ ხელშეკრულებებსა და შესაბამის იურისპრუდენციაში.
მიუხედავად იმისა, რომ ევროკავშირში პროგრესი მიღწეულია, გაერთიანება მზად არის შემდგომი ნაბიჯებისთვისაც. ევროკავშირი გააგრძელებს ლგბტი სამოქალაქო საზოგადოების ორგანიზაციებისა და ადამიანის უფლებათა დამცველების მხარდაჭერას, მათ შორის სტაბილური და წინასწარ განსაზღვრული დაფინანსებით. მათი საქმიანობა გადამწყვეტია დემოკრატიული ღირებულებებისა და კანონის უზენაესობის დაცვისთვის, მიუხედავად მზარდი ზეწოლისა.
ევროკავშირი გააგრძელებს ლგბტი ადამიანის უფლებათა დამცველების დაცვის გაძლიერების მოწოდებას, განსაკუთრებით იმ გარემოებებში, სადაც სამოქალაქო სივრცე მცირდება და რეპრესიები იზრდება.
მომდევნო წლებში ევროკომისიის ახალი LGBTIQ+ თანასწორობის სტრატეგია მიზნად ისახავს ძალადობისგან დაცვის გაძლიერებას, სიძულვილისა და დისკრიმინაციის წინააღმდეგ ბრძოლას, მათ შორის ონლაინ სივრცეში, ადამიანებისთვის თავისუფლად და თანასწორად ცხოვრების შესაძლებლობების გაფართოებას და საზოგადოების მობილიზებას რეალური თანასწორობის მისაღწევად", - ნათქვამია განცხადებაში.
