ევროპული დედაქალაქები მუშაობენ საკმაოდ ზუსტ გეგმაზე უკრაინაში ჯარების პოტენციური განლაგებისთვის, როგორც კონფლიქტის შემდგომი უსაფრთხოების გარანტიების ნაწილის, რომელსაც შეერთებული შტატების სრული მხარდაჭერა ექნება. ამის შესახებ ევროკომისიის პრეზიდენტმა უსრულა ფონ დერ ლაიენმა განაცხადა.
როგორც ევროკომისიის პრეზიდენტმა Financial Times-თან ინტერვიუში განაცხადა, ჯარების შესაძლო განლაგების „მკაფიო საგზაო რუკა“ არსებობს.
გამოცემა აღნიშნავს, რომ ფონ დერ ლაიენმა ეს განცხადება რუსეთის მოსაზღვრე ევროკავშირის აღმოსავლეთ ქვეყნებში მოგზაურობისას გააკეთა.
„უსაფრთხოების გარანტიები უაღრესად მნიშვნელოვანი და აბსოლუტურად აუცილებელია. ჩვენ გვაქვს მკაფიო საგზაო რუკა. ჩვენ თეთრ სახლში შეთანხმებას მივაღწიეთ. და ეს სამუშაო ძალიან კარგად მიმდინარეობს“, - განაცხადა ფონ დერ ლაიენმა.
მან თქვა, რომ დედაქალაქები „მრავალეროვანი ჯარების განლაგებისა და ამერიკული მხარდაჭერის“ გეგმებზე მუშაობენ.
„პრეზიდენტმა ტრამპმა დაგვარწმუნა, რომ ამერიკული ყოფნა მხარდაჭერის ნაწილი იქნებოდა. ეს ძალიან ნათელი იყო და არაერთხელ დადასტურდა“, - თქვა მან.
Financial Times -ის ცნობით, ჯარების შემადგენლობაში შესაძლოა ათიათასობით ევროპელი ჯარისკაცი შევიდეს, აშშ-ის მხარდაჭერით, მათ შორის სამეთაურო და კონტროლის სისტემებით, დაზვერვითა და სათვალთვალო აქტივებით.
ეს შეთანხმება ტრამპის, უკრაინის პრეზიდენტ ვოლოდიმირ ზელენსკისა და ევროპელი ლიდერების შეხვედრაზე მიაღწიეს.
„FT“-ის ცნობით, ვაშინგტონში ტრამპთან შეხვედრის მონაწილეები ხუთშაბათს პარიზში შეხვედრას გეგმავენ მაღალი დონის მოლაპარაკებების გასაგრძელებლად.
შეხვედრას დაესწრებიან გერმანიის კანცლერი ფრიდრიხ მერცი, დიდი ბრიტანეთის პრემიერ-მინისტრი კირ სტარმერი, ნატო-ს გენერალური მდივანი მარკ რუტე და ევროკომისიის პრეზიდენტი ურსულა ფონ დერ ლაიენი.
ფონ დერ ლაიენმა მაღალი შეფასება მისცა ტრამპის მზადყოფნას, ჩაერთოს სამშვიდობო ძალისხმევაში.
„პუტინი არ შეცვლილა, ის მტაცებლად რჩება. ტრამპს მშვიდობა სურს, მაგრამ პუტინი მოლაპარაკებების მაგიდასთან არ ჯდება...
მას ნეგატიური გამოცდილება აქვს პუტინთან, რომელიც სულ უფრო ხშირად არ ასრულებს თავის დაპირებებს.
ბოლო რამდენიმე თვის განმავლობაში ჩვენ გვქონდა რამდენიმე შეხვედრა, რომლის დროსაც ცხადი გახდა, რომ ევროპელებს შეიძლება დავეყრდნოთ. ცხადია, რომ როდესაც რაღაცას ვამბობთ, ვასრულებთ კიდეც“, - თქვა ურსულა ფონ დერ ლაიენმა.
