საქართველოს საგარეო საქმეთა სამინისტრო ე.წ. "აფხაზეთის რესპუბლიკაში" 2010 წელს რუსეთის ფედერაციის სავაჭრო წარმომადგენლობის დაარსებას აპროტესტებს.
ამის შესახებ საგარეო უწყებამ ოფიციალური განცხადება გაავრცელა.
"საქართველოს საგარეო საქმეთა სამინისტრო რუსეთის დესტრუქციული ქმედებებთან დაკავშირებით მკაცრ პროტესტს გამოთქვამს და ქვეყნის განუყოფელი ნაწილების ოკუპაციისა და ანექსიის შეწყვეტას მოითხოვს.
აღნიშნული ფაქტი საერთაშორისო სამართლის საყოველთაოდ აღიარებული ნორმებისა და პრინციპების უხეშ დარღვევას, საქართველოს სუვერენიტეტის ხელყოფის მორიგ მცდელობას და ტერიტორიის განუყოფელი ნაწილების ანექსიის პოლიტიკის კიდევ ერთ გამოვლინებას წარმოადგენს. სამხედრო ბაზების შექმნისა და ე.წ. "საზღვრების" ერთობლივად დაცვის შესახებ ე.წ. შეთანხმებების დადების შემდეგ, რუსეთი ამ ნაბიჯით ცდილობს სრულად მოაქციოს ოკუპირებული ტერიტორიები თავის არა მხოლოდ სამხედრო-პოლიტიკურ, არამედ ეკონომიკურ სივრცეში", - ნათქვამია განცხადებაში.
შეგახსენებთ, რომ 2010 წლის 31 მარტს რუსეთის მთავრობამ განკარგულება გამოსცა საქართველოს ოკუპირებულ ტერიტორიაზე - ე.წ. "აფხაზეთის რესპუბლიკაში" 2010 წელს რუსეთის ფედერაციის სავაჭრო წარმომადგენლობის დაარსების შესახებ.
