აშშ-ს სახელმწიფო მდივნის ყოფილი მოადგილე, ბილ კლინტონის მრჩეველი რუსეთის საკითხებში ამჟამად კი ბრუკინგზის ინსტიტუტის პრეზიდენტი სტროუბ ტელბოტი უკრაინული მედიისათვის მიცემულ ინტერვიუში საქართველოზე საუბრობს და აცხადებს, რომ მისი აზრით, საქართველო-რუსეთის ომი პუტინის პოლიტიკის დასასრულია და არა მისი დასაწყისი.
"დარწმუნებული ვარ, რომ ეს დასასრულია. ეს დასაწყისი არ არის", _ აცხადებს ტელბოტი და აღნიშნავს, რომ საქართველოსთან მიმართებაში რუსეთი XIX საუკუნის მეთოდებით იქცევა.
"რუსეთმა საქართველოს ტერიტორიის ნაწილის ოკუპაცია და ანექსია განახორციელა. ეს XIX საუკუნის საქციელია, ხოლო გამოწვევები რომლებსაც ჩვენ ყველანი ერთად ვეჯახებით, მდგომარეობს იმაში, რომ ნაციონალური ინტერესები XXI საუკუნის შესაბამისობაში მოვაქციოთ", _ აცხადებს ტელბოტი.
მისივე თქმით, მისი აზრით, უკრაინისათვის განსაკუთრებული მნიშვნელობა აქვს საქართველოსთან ახლო ურთიერთობების მხარდაჭერას.
"კიევში თბილისიდან ჩამოვედი და ჩემი შემდგომი გაჩერება მოსკოვში იქნება. დღეს თბილისსა და მოსკოვს შორის პირდაპირი ავიარეისები არ არსებობს და ეს მდგომარეობა სიმბოლოა იმისა, თუ რა მდგომარეობაში იმყოფება ამ ორ ქვეყანას შორის ურთიერთობები. იმედი მაქვს, რომ უკრაინა დაეხმარება ორ ქვეყანას შემცირდეს მათ შორის არსებული უფსკრული", _ აცხადებს ტელბოტი.
