პარლამენტის პირველი ვიცე-სპიკერი მიხეილ მაჭავარიანი იმედოვნებს, რომ "შეიცვლება დრო და უკრაინა ისევ ნატოსკენ მობრუნდება". ამის შესახებ განცხადება მაჭავარიანმა დღეს პარალმენტში ჟურნალისტებთან საუბრისას უკრაინის პრეზიდენტის მიერ მიღებული გადაწყვეტილების კომენტარისას გააკეთა.
შეგახსენებთ, რომ უკრაინის პრეზიდენტმა ვიქტორ იანუკოვიჩმა ნატოში უკრაინის შესვლისთვის მომზადების საკითხთა კომისია გააუქმა. მან შესაბამისი ბრძანება გასულ კვირას გამოსცა. გარდა ამისა უკრაინის პრეზიდენტმა ასევე გააუქმა ევროატლანტიკური ინტეგრაციის საკითხთა ეროვნული ცენტრი ხოლო ცენტრის თავმჯდომარე ვლადიმერ გორბულინი თანამდებობიდან გაათავისუფლა.
აღნიშნული კომისია და ევროატლანტიკური ინტეგრაციის საკითხთა ეროვნული ცენტრი ყოფილმა პრეზიდენტმა ვიქტორ იუშენკომ 2006 წელს შექმნა.უკრაინის პრეზიდენტის ამ გადაწყვეტილებას პარლამენტის ვიცე სპიკერი მიხეილ მაჭავარიანი მის საარჩევნო კამპანიას უკავშირებს. როგორც იგი აღნიშნავს, მოსახლეობის განწყობის მხრივ ნატოსთან მიმართებაში სპეციფიური სიტუაციაა და მიიჩნევს, რომ იანუკოვიჩმა აღნიშნული გადაწყყვეტილება ამ სპეციფიკის გათვალისწინებით მიიღო.
"მოქმედი პრეზიდენტის საარჩევნო პლატფორმაში იყო რომ უკრაინა არ უნდა ყოფილიყო არცერთი ბლოკეს წევრი და უნა ყოფილიყო ხიდი აღმოსავლეთსა და დასავლეთს შორის. უკრაინას ჰყავს პრეზიდენტი, რომელიც აირჩია ხალხმა ამ დაპირებების გათვალისწინებით და ახლა იგი ასრულებს ამ დაპირებას" - აცხადებს მაჭავარიანი და დასძენს, რომ "იმედია შეიცვლება დრო და უკრაინა ისევ ნატოსკენ მობრუნდება. გარდა ამისა მიხეილ მაჭავარიანი აქცენტს აკეთებს იმაზეც, რომ "უკრაინისაგან განსხვავებით საქართველოში ნატოში ინგტეგრაცისიათვის მხარდაჭერა დიდია, რასაც ყველა კველვა ადასტურებს და საქართველოში ამ მხრივ ვითარების შეცვლა არანაირად არ არის მოსალოდნელი.
