რუსეთის საგარეო საქმეთა სამინისტრო სხვა ქვეყნების მიერ საქართველოს ოკუპირებული რეგიონების აფხაზეთისა და ე.წ. სამხრეთ ოსეთის ე.წ. დამოუკიდებლობის აღიარებისათვის მიზანმიმართულ და უწყვეტ მუშაობას ახორციელებს. ეს განცხადება რუსეთის საგარეო საქმეთა სამინისტროს მეოთხე დეპარტამენტის ხელმძღვანელმა ანდრეი კელინმა რუსეთის საგარეო საქმეთა სამინისტროსთან არსებულ მოსკოვის საერთაშორისო ურთიერთობათა ინსტიტუტში გამართულ სამეცნიერო კონფერენციაზე გააკეთა.
"რუსეთის საგარეო საქმეთა სამინისტრო აფხაზეთის საერთაშორისო აღიარების ხელისშეწყობისათვის სამუშაოს აწარმოებს. თუმცა ეს ხანგრძლივვადიანი სამუშაოა. მაგალითად, საბჭოთა კავშირსაც მრავალი წელი არ აღიარებდნენ", _ განაცხადა კელინმა.
აღნიშნულ კონფერენციას მოსკოვში სამუშაო ვიზიტად მყოფი სეპარატისტული აფხაზეთის ე.წ. პრემიერ მინისტრი სერგეი შამბაც ესწრებოდა.
