როგორც "ჯი-ეიჩ-ენს" პრემიერის აპარატიდან აცნობეს, საქართველოს მთავრობის ხელმძღვანელი ბელგიის კოლეგა პრემიერ-მინისტრ ივ ლეტერმს, , ევროკომისარს ტრანსპორტის საკითხებში სიმ კალასს და ევროკომისარს ევროკავშირის გაფართოების და მეზობლობის პოლიტიკის საკითხებში შტეფან ფულეს შეხვდა. მხარეებმა საჰაერო რეისების თაობაზე ხელშეკრულების გაფორმებაზე ისაუბრეს.

როგორც ნიკა გილაურმა აღნიშნა, "ყველაზე მნიშვნელოვანი ნაწილი არის ფრენების შესახებ ხელშეკრუელბა. ეს ხელს შეუწყობს კიდევ უფრო მეტი ავიაკომპანიის მოწვევას საქართველოში, უფრო მეტ ქალაქთან პირდაპირი ფრენის გახსნას.

"ბრიუსელის კონფერენციაზე 4.5 მილიარდი იქნა შეპირებული საქართველოსთვის. აქედან რაღაც ნაწილი მოდიოდა ევროკავშირის დაფინანსებაზე. 2009 წელს ჩვენ ავითვისეთ საკმაოდ დიდი თანხა, ეს ძირითადად ლტოლვილებისთვის სახლების მშენებლობას მოხმარდა. წელსაც ჩვენ ვაპირებთ იგივე პროექტები გავაგრძელოთ და დაფინანსება მივიღოთ ევროკავშირისგან", - განაცხადა გილაურმა.

გარდა ამისა, ვიზიტის ფარგლებში საქართველოს პრემიერ-მინისტრმა ევროკავშირის პრეზიდენტ ჰერმან ვან რომპეისთანაც გამართა შეხვედრა.

შეხვედრისას ჰერმან ვან რომპუიმ განაცხადა, რომ საქართველო სამხრეთ კავკასიაში ერთადერთი ქვეყანაა, რომელთანაც ევროკავშირს გამარტივებული ვიზებისა და რეადმისიების შეთანხმება აქვს.

"ამჟამად ევროკავშირი საქართველოსთან ასოცირების შესახებ შეთანხმებას განიხილავს. შეთანხმებაში თავისუფალი ვაჭრობის კომპონენტიც იქნება გათვალისწინებული", - აღნიშნა ევროკავშირის პრეზიდენტმა და იმედი გამოთქვა, რომ ამ საკითხთან დაკავშირებით მხარეები მოლაპარაკებებს უახლოეს მომავალში დაიწყებენ.

საქართველოს პრემიერ-მინისტრთან შეხვედრისას ევრიკავშირის პრეზიდენტმა ისიც განაცხადა, რომ "ევროკავშირი მხარს უჭერს საქართველოს ტერიტორიულ მთლიანობასა და სუვერენიტეტს და მოელის,რომ რუსეთი ცეცხლის შეწყვეტის შესახებ შეთანხმებას შეასრულებს".

ჰერმან ვან რომპეის თქმით, ევროკავშირი საქართველოში მიმდინარე მოვლენებს აკვირდება და მიუხედავად იმისა, რომ თვითმმართველობის არჩევნებზე დამკვირვებლებს არ აგზავნის, ამ პროცესს მაინც ყურადღებით დააკვირდება.

გილაური საქართველოში დღეს დაბრუნდება.