მთავრობის ინიციატივით, ,,უცხოელთა და მოქალაქეობის არმქონე პირთა სამართლებრივი მდგომარეობის შესახებ“ კანონში მორიგი ცვლილებები იგეგმება.როგორც კანონპროექტის განმარტებით ბარათშია მითითებული კანონპროექტი ითვალისწინებს შემდეგ ცვლილებებს:კანონპროექტი ითვალისწინებს შემდეგ ცვლილებებს:კანონპროექტი ითვალისწინებს საქართველოს ვიზის გაცემაზე უფლებამოსილი ორგანოების ჩამონათვალის გაზრდას, კერძოდ: დგინდება შესაძლებლობა საქართველოს ვიზის გაცემაზე გადაწყვეტილება მიღებული იქნეს უშუალოდ საქართველოს საგარეო საქმეთა სამინისტროს მიერ.
შესაბამისად, კანონპროექტის მიხედვით, საქართველოს ვიზის გამცემ ორგანოებს (საზღვარგარეთ საქართველოს დიპლომატიური წარმომადგენლობა და საკონსულო დაწესებულება, საქართველოს სახელმწიფო საზღვარზე ვიზის გაცემისას საქართველოს შინაგან საქმეთა სამინისტროს მიერ განსაზღვრული ორგანო) დაემატება საქართველოს საგარეო საქმეთა სამინისტრო.
გარდა ზემოაღნიშნულისა, საქართველოს ვიზის გამცემ ორგანოებთან დაკავშირებით კანონპროექტი ითვალისწინებს ჩანაწერს, რომლის მიხედვითაც შესაძლებელია იმ უცხოელებისათვის, რომელთა მოქალაქეობის ქვეყანაშიც საქართველოს არ აქვს დიპლომატიური წარმომადგენლობა ან საკონსულო დაწესებულება, საქართველოს ვიზის გაცემა ან საქართველოს ვიზის გაცემისათვის საჭირო ცალკეული მოქმედებების განხორციელება მიენდოს იმ მესამე სახელმწიფოს, რომელიც მისაღები იქნება ადგილსამყოფელი სახელმწიფოსთვის.
ამასთან, კანონით გათვალისწინებულია, რომ აღნიშნულ შემთხვევაში საქართველოს ვიზის გაცემის ან მისი გაცემისათვის საჭირო ცალეული მოქმედების განხორციელების პირობები განისაზღვრება შესაბამისი საერთაშორისო ხელშეკრულებით ან შეთანხმებით. ამ ცვლილებით უზრუნველყოფილი იქნება მსგავსი კატეგროიის ქვეყნის მოქალაქეთათვის საქართველოს ვიზის მიღების ხელმისაწვდომობა. კანონპროექტით საქართველოს საგარეო საქმეთა სამინისტროს ენიჭება საქართველოს ელექტრონული ვიზების გაცემის უფლებამოსილება.
საქართველოს ვიზის მიღების მსურველ უცხოელთა დიდი რაოდენობის გათვალისწინებით, არსებობს საჭიროება საქართველოს ვიზა გაიცეს გამარტივებულად - ელექტრონული ფორმით და მისი გაცემა მოხდეს იმ ორგანოს მიერ, რომელიც ნაკლებად არის დატვირთული სავიზო განაცხადების განხილვით, კერძოდ კი საქართველოს საგარეო საქმეთა სამინისტროს მიერ.
შესაბამისად, კანონპროექტით დგინდება, რომ საქართველოს საგარეო საქმეთა სამინისტრო უფლებამოსილია საზღვარგარეთ მყოფ უცხოელზე გასცეს ელექტრონული ვიზა, მხოლოდ იმ შემთხვევაში, თუ ელექტრონული ვიზის მისაღებად საჭირო სავიზო განაცხადის წარდგენა მოხდება სამინისტროს სპეციალური ვებვერდის - „ელექტრონული ვიზის პორტალის“ მეშვეობით.
როგორც კანონპროექტის განმარტებით ბარათშია მითითებული, აღნიშნული ცვლილება უზრუნველყოფს საზღვარგარეთ საქართველოს დიპლომატიური წარმომადგენლობებისა და საკონსულო დაწესებულებების დატვირთულობის შემცირებას, საქართველოს ვიზების ხელმისაწვდომობას, ასევე გაამარტივებს საქართველოს ვიზების მოპოვების პროცედურას. კონკრეტული შემთხვევები, თუ რა კატეგორიის ვიზის გაცემა იქნება შესაძლებელი „ელექტრონული ვიზის პორტალის“ მეშვეობით წარდგენილი სავიზო განაცხადის საფუძველზე კი განისაზღვრება საქართველოს მთავრობის დადგენილებით.
