„ბოლო 20 წლის განმავლობაში, წელს პირველად ერთ დღეში 4 000 ტომაზე მეტი ყურძენი გადამუშავდა"- აღნიშნულის შესახებ განცხადება ღვინის ეროვნული სააგენტოს თავმჯდომარემ ლევან დავითაშვილმა გააკეთა. დავითაშვილის თქმით, საწარმოების გააქტიურება და ყურძნის მაღალ ფასში ჩაბარება სახელმწიფოს მიერ დარგში გატარებული სწორი პოლიტიკის შედეგია.
,,2013 წლის რთველი გარდამავალი ეტაპია მევენახეობა-მეღვინეობის სწრაფი და სწორი განვითრებისთვის. სახელმწიფოს მხრიდან გადაიდგა რეალური ნაბიჯები ამ დარგის განვითარებისთვის, რაც აისახა კიდეც რთველის მიმდინარეობაზე. ხელისუფლებამ სუბსიდიის პროგრამა სრულიად ახალი მიდგომით განახორციელა. სუბსიდიის პროგრამაში მეწარმეების ჩართვა ნებაყოფლობითია. დღეის მდგომარეობით, ყურძნის სავარაუდო შესყიდვაზე განაცხადის ფორმა წარმოადგინა 85 კომპანიამ, ხოლო ხელშეკრულება სსიპ ღვინის ეროვნულ სააგენტოსთან უკვე გაფორმებული აქვს 53 კომპანიას. სახელმწიფო აღარ არის წარმოდგენილი, როგორც კერძო სექტორის კონკურენტი და ის, მხოლოდ გარკვეულ შემთხვევებში ჩაიბარებს ყურძენს. გლეხებსა და მევენახეებს, რომლებიც ვერ მიაღწევენ მეწარმეებთან შეთანხმებას, შესაძლებლობა აქვთ მიმართონ სახელმწიფო საწარმოებს," - განაცხადა ლევან დავითაშვილმა.
ღვინის ეროვნული სააგენტოს ხელმძღვანელმა აღნიშნა, რომ 2013 წლის 11 სექტემბრის ჩათვლით კახეთის რეგიონში 51 კომპანიის მიერ გადამუშავდა 21534.5 ტონა ყურძენი შემდეგ რაიონებში: ახმეტა, გურჯაანი, დედოფლისწყარო, თელავი, ლაგოდეხი, სიღნაღი, საგარეჯო და ყვარლი. რთველი 2013-ის ფარგლებში მუნიციპალიტეტები დიდ ქალაქებში გამოყოფენ სავაჭრო ადგილებს უფასოდ, სადაც მევენახეებს შეეძლებათ ყურძნის გაყიდვა. ხარისხიანი ყურძნის ღირებულება სავარაუდოდ 1 ლარსა და ლარზე მეტს შეადგენს. რიგ შემთხვევებში, ღვინის მწარმოებელი კომპანიები მოლაპარაკების საფუძველზე ფერმერებს/გლეხებს ყურძნის ტრანსპორტირების ხარჯებსაც უნაზღაურებენ.
,,აქტიურად ფუნქციონირებს რთველის საკოორდინაციო შტაბი ქალაქ გურჯაანში. 24 საათის განმავლობაში მოქმედებს ცხელი ხაზი: 2 470101; რეგიონული ცენტრები (დარეგისტრირებული საწარმოები) ყურძნის ორგანიზებულად ჩაბარებისთვის უზრუნველყოფილნი არიან კომპიუტერული ტექნიკითა და პროგრამული სისტემით. ონლაინ რეჟიმში აღირიცხება ფერმერის/გლეხის მიერ ჩაბარებული ყურძნის რაოდენობა, სახეობა და ხარისხი. ჩაბარებულ ყურძნის რაოდენობის, ხარისხისა და სახეობის აღწერას მეწარმესთან ერთად აკონტროლებენ შტაბის წევრებიც," - აღნიშნა ლევან დავითაშვილმა.
სახელმწიფოს ხელშეწყობით, თანაბარ პირობებში ჩადგებიან დიდი და მცირე ფერემერები. არ მოხდება დიფერენცირება მცირე და დიდი ნაკვეთებიდან მიღებულ ყურძენზე. სახელმწიფო სუბსიდიას გასცემს მეწარმეებზე ყოველგვარი ვაუჩერის გარეშე, პირდაპირი გადახდის გზით. სახელმწიფო სუბსიდია ე.წ. კონდიცირებულ, ხარისხიან 1 კგ რქაწითელსა და კახურ მწვანეზე 40 თეთრს შეადგენს, ხოლო 1 კგ საფერავზე სუბსიდია 25 თეთრია. სუბსიდიის პროგრამაში მეწარმეების ჩართვა ნებაყოფლობითია.