სლოვაკეთი გაყინული რუსული აქტივების უკრაინის მხარდასაჭერად გამოყენების წინააღმდეგია. ამის შესახებ სლოვაკეთის პრემიერ-მინისტრმა, რობერტ ფიცომ განაცხადა. მისი თქმით, სლოვაკეთი ევროკავშირის ამ წინადადებას არ დათანხმდება.
„სლოვაკეთი გაყინული აქტივების ჩამორთმევის არცერთ სამართლებრივ და ფინანსურ სქემაში არ მიიღებს მონაწილეობას, თუ ეს თანხები უკრაინის სამხედრო ხარჯებისთვის დაიხარჯება. ჩვენ ომის დასრულება გვსურს თუ მისი გამწვავება? ჩვენ ვგეგმავთ, რომ უკრაინისთვის 140 მილიარდი ევრო გამოვყოთ, რათა ომი გაგრძელდეს. რას ნიშნავს ეს? იმას, რომ ომი კიდევ ორი წელი გაგრძელდება“, - აღნიშნა ფიცომ.
ევროკავშირი 140 მილიარდი ევროს ოდენობის გაყინული რუსული აქტივების გამოყენების გეგმას უჭერს მხარს. მიზანი უკრაინის დახმარებაა, რომელსაც 2026 წლის დასაწყისისთვის ახალი დაფინანსება დასჭირდება. გაყინული რუსული აქტივების ძირითადი ნაწილი ბელგიის ფინანსურ საცავში, Euroclear-შია შენახული. გეგმის დამტკიცება სწორედ ბელგიის ყოყმანის გამო ვერ მოხერხდა, თუმცა, გავრცელებული ინფორმაციით, საკითხი ევროკავშირის დღის წესრიგში რჩება, საბოლოო გადაწყვეტილება კი 2025 წლის დეკემბერში იქნება მიღებული. ბლოკი იმედოვნებს, რომ ბელგიასთან შეთანხმებას მიაღწევს.
