ნატო-ს გენერალურმა მდივანმა მარკ რუტემ აშშ-ის პრეზიდენტ დონალდ ტრამპის, ჩინეთის ლიდერ სი ძინპინისა და რუსეთის პრეზიდენტ ვლადიმირ პუტინის სამმხრივი შეხვედრა ნორმალურ მოვლენად შეაფასა და განაცხადა, რომ ამის გამო შეშფოთების საფუძველი არ აქვს.
რუტეს თქმით, სახელმწიფოთა ლიდერების შეხვედრები ჩვეულებრივი მოვლენაა, განსაკუთრებით მაშინ, როდესაც საქმე სამ ბირთვულ სახელმწიფოს ეხება.
„მნიშვნელოვანია, რომ ლიდერები ერთმანეთს ხვდებოდნენ, მათ შორის ბირთვული სახელმწიფოების ლიდერებიც. ამიტომ სრულიად ნორმალურია, რომ ეს ადამიანები ერთმანეთს ხვდებიან, მართავენ შეხვედრებს და ცდილობენ, წინსვლის უკეთეს გზებზე შეთანხმდნენ“, - განაცხადა ნატო-ს გენერალურმა მდივანმა.
რუტემ ასევე აღნიშნა, რომ დონალდ ტრამპი უკრაინაში მშვიდობის მისაღწევად მუდმივად „ტიტანურ ძალისხმევას“ მიმართავს და ამის გამო მას მხოლოდ მისი შექება შეუძლია.
შეგახსენებთ, 19 ნოემბერს ჩინეთის ლიდერი სი ძინპინი, აშშ-ის პრეზიდენტი დონალდ ტრამპი და რუსეთის პრეზიდენტი ვლადიმირ პუტინი ისტორიაში პირველი სამმხრივი სამიტის ფარგლებში შეხვდნენ.
შეხვედრისას სი ძინპინმა დიდი სახელმწიფოების თანაარსებობის წესების შემუშავება შესთავაზა, რომელთა შორის ერთ-ერთი ბირთვული იარაღის სრულად განადგურებას ითვალისწინებს.