რუსეთის საგარეო საქმეთა სამინისტროს ინფორმაციით, მიხაილ გალუზინსა და გიორგი ზურაბაშვილს შორის მინსკში შეხვედრა გაიმართა. მხარეებმა საქართველო-რუსეთის ურთიერთობების საკითხები და ორმხრივი თანამშრომლობის შესაძლო მიმართულებები განიხილეს.
ამის შესახებ რუსეთის საგარეო საქმეთა სამინისტრო ოფიციალურ ვებგვერდზე გამოქვეყნებულ განცხადებაში წერს.
გიორგი ზურაბაშვილი საქართველოს პრემიერ-მინისტრის სპეციალური წარმომადგენელია რუსეთთან ურთიერთობის საკითხებში და ამავდროულად საგარეო საქმეთა მინისტრის პირველი მოადგილის თანამდებობას იკავებს. მიხაილ გალუზინი კი რუსეთის საგარეო საქმეთა მინისტრის მოადგილეა.
ეს მათი პირველი შეხვედრა იყო. შეხვედრა 19 ნოემბერს, ბელარუსის დედაქალაქ მინსკში გაიმართა.
უწყების ცნობით, მხარეებმა რეგიონული უსაფრთხოების საკითხები განიხილეს.
„ორივე დელეგაციის ხელმძღვანელებმა მადლიერება გამოხატეს ბელარუსული მხარის მიმართ რუსულ-ქართული შეხვედრის ორგანიზებაში გაწეული დახმარებისთვის. მიღწეული იქნა შეთანხმება კონტაქტების გაგრძელების შესახებ რუსეთსა და საქართველოს შორის ურთიერთობების შემდგომი განვითარების ინტერესებიდან გამომდინარე“, - აღნიშნულია განცხადებაში.