უკრაინის პრეზიდენტმა ვოლოდიმირ ზელენსკიმ აშშ-ის პრეზიდენტის წარმომადგენლებთან, ჯარედ კუშნერთან და სტივ უიტკოფთან 12 ნოემბერს გამართული შეხვედრის შემდეგ განაცხადა, რომ რუსეთთან უკრაინელი სამხედრო ტყვეების ყველაზე მასშტაბური გაცვლა იგეგმება.
ამის შესახებ ზელენსკიმ დუბლინში გამართულ პრესკონფერენციაზე ისაუბრა.
„რუსეთში ვიზიტის შემდეგ ამერიკულმა გუნდმა ძალიან მნიშვნელოვანი შედეგი ჩამოიტანა - სამხედრო ტყვეების გაცვლა შედგება. სტივმა და ჯარედმა მითხრეს, რომ ეს სამხედრო ტყვეების ყველაზე მასშტაბური გაცვლა იქნება.
ჩვენი ბიჭები, ჩვენი ჯარისკაცები სახლში ბრუნდებიან. ძალიან მადლიერი ვარ ყველა ჩვენი მომლაპარაკებლის. ეს რეალური შედეგია. უპირველეს ყოვლისა, ეს ოჯახებისთვის და, რა თქმა უნდა, ყველა ჩვენგანისთვის წარმატებაა, რადგან ადამიანები სახლში, საკუთარ ოჯახებთან დაბრუნდებიან“, - განაცხადა ზელენსკიმ.
ზელენსკის გაცვლის მონაწილე სამხედრო ტყვეების კონკრეტული რაოდენობა არ დაუსახელებია. თუმცა მანამდე პრეზიდენტი აცხადებდა, რომ მოლაპარაკებებზე გაცვლის ფორმატად 1 000-ის 1 000-ზე ან 1 500-ის 1 500-ზე გაცვლა განიხილებოდა.
ზელენსკიმ მოლაპარაკებების კიდევ ერთ მნიშვნელოვან შედეგად დაასახელა ის, რომ მომდევნო შეხვედრაში ევროპელი წარმომადგენლებიც მიიღებენ მონაწილეობას და მოლაპარაკებების მაგიდასთან საკუთარი პოზიციის დაფიქსირების შესაძლებლობა ექნებათ.
