მადაგასკარის პრეზიდენტმა ანდრი რაჯოელინამ არეულობისა და საპროტესტო აქციების ფონზე ქვეყანა დატოვა. იუწყება Reuters.
პარლამენტში ოპოზიციის ლიდერმა, სიტენი რანდრიანასოლონიაკომ განაცხადა, რომ რაჯოელინამ მადაგასკარი კვირას დატოვა მას შემდეგ, რაც არმიის დანაყოფები მომიტინგეების მხარეს გადავიდნენ.
„ჩვენ დავურეკეთ პრეზიდენტის ადმინისტრაციას და მათ დაადასტურეს, რომ მან ქვეყანა დატოვა“, - თქვა მან და დასძინა, რომ რაჯოელინას ადგილსამყოფელი უცნობია.
პრეზიდენტის ადმინისტრაციას კომენტარი არ გაუკეთებია.
ორშაბათს გვიან ღამით ერისადმი მიმართვაში რაჯოელინამ განაცხადა, რომ იძულებული გახდა უსაფრთხო ადგილას გადასულიყო, რათა თავისი სიცოცხლე დაეცვა.
მას თავისი ადგილსამყოფელი არ გაუმხელია, თუმცა თქვა, რომ „მადაგასკარის განადგურებას არ დაუშვებდა“.
დიპლომატიურმა წყარომ პრეზიდენტის გამოსვლის შემდეგ განაცხადა, რომ რაჯოელინა გადადგომაზე უარს ამბობს.
სამხედრო წყარომ Reuters-ს განუცხადა, რომ რაჯოელინამ მადაგასკარი, ყოფილი საფრანგეთის კოლონია, კვირას ფრანგული სამხედრო თვითმფრინავით დატოვა.
ფრანგულმა მედიამ გაავრცელა ინფორმაცია, რომ მან პრეზიდენტ ემანუელ მაკრონთან შეთანხმებას მიაღწია.
ღაზის სექტორში ცეცხლის შეწყვეტისა და მძევლების გათავისუფლების შესახებ გამართული სამიტის შემდეგ ეგვიპტეში გამოსვლისას მაკრონმა განაცხადა, რომ მას არ შეუძლია დაუყოვნებლივ დაადასტუროს ინფორმაცია იმის შესახებ, რომ საფრანგეთი რაჯოელინას ქვეყნიდან გაქცევაში დაეხმარა.
მან დასძინა, რომ მადაგასკარში კონსტიტუციური წესრიგი უნდა იყოს დაცული.
სამხედრო წყაროს ცნობით, ფრანგული არმიის თვითმფრინავი კვირას მადაგასკარის სენტ-მარის აეროპორტში დაეშვა.
25 სექტემბერს, მთელი ქვეყნის მასშტაბით წყლისა და ელექტროენერგიის დეფიციტის გამო დემონსტრაციები დაიწყო, თუმცა გამოსვლები სწრაფად გადაიზარდა აჯანყებაში, რომელიც უფრო ფართო საკითხებს, მათ შორის კორუფციას, ცუდ მმართველობასა და ძირითადი მომსახურების ნაკლებობას ეხებოდა.
მადაგასკარის პრეზიდენტის ანდრი რაჯოელინას ადმინისტრაციამ კვირას განაცხადა, რომ ქვეყანაში ძალაუფლების უკანონო და ძალადობრივი გზით ხელში ჩაგდების მცდელობა გრძელდება.
