მადლობას ვუხდი პრეზიდენტ ტრამპს და მის გუნდს ღაზაში ცეცხლის შეწყვეტის შეთანხმების მისაღწევად გაწეული სამუშაოსთვის, აშშ-სა და მსოფლიოს მხარდაჭერით, დღეს ახლო აღმოსავლეთი მშვიდობის გზაზეა - ჯო ბაიდენი
აშშ-ის ყოფილმა პრეზიდენტმა ჯო ბაიდენმა შეაქო აშშ-ის ამჟამინდელი ლიდერი დონალდ ტრამპი ისრაელსა და “ჰამასს” შორის ღაზiს სექტორში ომის დასრულებისკენ მიმართული ძალისხმევისთვის. ამის შესახებ ბაიდენმა Х-ზე დაწერა.
ბაიდენმა განაცხადა, რომ ის „ძალიან მადლიერია“ და „შვებას გრძნობს“, რომ ეს დღე დადგა.
„ძალიან მადლიერი და მოხარული ვარ, რომ ეს დღე დადგა - ბოლო 20 გადარჩენილი მძევლისთვის, რომლებმაც წარმოუდგენელი ჯოჯოხეთი გამოიარეს და საბოლოოდ დაუბრუნდნენ თავიანთ ოჯახებსა და საყვარელ ადამიანებს, ასევე ღაზას მშვიდობიანი მოსახლეობისთვის, რომლებმაც განუზომელი დანაკარგები განიცადეს და საბოლოოდ ექნებათ შესაძლებლობა დაუბრუნდნენ ნორმალურ ცხოვრებას.
ამ შეთანხმებისკენ მიმავალი გზა ადვილი არ იყო. ჩემმა ადმინისტრაციამ დაუღალავად იმუშავა მძევლების სახლში დასაბრუნებლად, პალესტინელი მშვიდობიანი მოსახლეობისთვის დახმარების გასაწევად და ომის დასასრულებლად.
მადლობას ვუხდი პრეზიდენტ ტრამპს და მის გუნდს ცეცხლის შეწყვეტის ახალი შეთანხმების უზრუნველსაყოფად გაწეული სამუშაოსთვის.
შეერთებული შტატებისა და მსოფლიოს მხარდაჭერით, დღეს ახლო აღმოსავლეთი მშვიდობის გზაზე დგას, რომელიც, იმედი მაქვს, ხანგრძლივი იქნება და ისრაელელებსა და პალესტინელებს თანაბარი მშვიდობის, ღირსეულ და უსაფრთხო მომავალს შეუქმნის“, - განაცხადა ამერიკის ექსპრეზიდენტმა.
