ჯო ბაიდენის საპრეზიდენტო არჩევნებში გამარჯვებულად გამოცხადების შემდეგ, დონალდ ტრამპის ადვოკატებმა ფილადელფიაში საგანგებო პრესკონფერენცია გამართეს.
რუდი ჯულიანმა, დონალდ ტრამპის ერთ-ერთმა ადვოკატმა და ტრამპის მოკავშირემ განაცხადა, რომ ორშაბათიდან შეუდგებიან სამართლებრივ ბრძოლას არჩევნების შედეგების გასასაჩივრებლად.
ცოტა ხნით ადრე, დონალდ ტრამპის საარჩევნო შტაბმა გაავრცელა განცხადება, სადაც აღნიშნულია, რომ თავიანთ სიმართლეს სასამართლოში დაიცავენ.
ტრამპის შტაბში განაცხადეს, რომ ჯო ბაიდენმა იჩქარა, როდესაც თავი არჩეულ პრეზიდენტად გამოაცხადა.
"მე არ გავჩერდები, ვიდრე ამერიკელი ხალხი არ მიიღებს ხმების კანონიერ დათვლას, რომელსაც ის იმსახურებს და რომელსაც მოითხოვს დემოკრატია. ჩვენ ყველამ ვიცით, რომ ჯო ბაიდენი ჩქარობს ყალბად იპოზიოროს გამარჯვებული სახით. რატომ ცდილობენ მედიაში მის მოკავშირეები დახმარებას - მათ არ სურთ, რომ სიმართლე გაირკვეს", - ნათქვამია ტრამპის განცხადებაში, რომელიც შტაბმა გაავრცელა.
ტრამპი მთელი საარჩევნო პროცესის განმავლობაში თავს ესხმოდა ჯო ბაიდენსა და დემოკრატიულ პარტიას და ყოველგვარი მტკიცებულებების გარეშე, მათ არჩევნების გაყალბებასა და ხმების მიტაცებაში ადანაშაულებდა.
ცოტა ხნის, წინ შეერთებული შტატების არჩეულმა პრეზიდენტმა, ჯო ბაიდენმა პენსიილვანიის შტატში დაჯაბნა თავისი მეტოქე, მოქმედი პრეზიდენტი დონალდ ტრამპი და საარჩევნო კოლეგიის 273 წევრის ხმა მოიპოვა, რითაც ის ამერიკის 46-ე პრეზიდენტი გახდა.
კალიფორნიის სენატორი კი, როგორც ჯო ბაიდენის ვიცე-პრეზიდენტობის კანდიდატი, თეთრ სახლში თავის პოსტს დაიკავებს და ამერიკის ისტორიაში პირველი ქალი ვიცე-პრეზიდენტი იქნება.
გარდა ამისა, კამალა ჰარისი აშშ-ის პირველი ფერადკანიანი და სამხრეთაზიური წარმოშობის ვიცე-პრეზიდენტი იქნება.
