ბრიტანული ტაბლოიდური გამოცემა Daily Mail-ი წერს, რომ რუსეთის ფედერაციის პრეზიდენტი ვვლადიმირ პუტინი 2021 წლის იანვარში თანამდებობის დატოვების შესახებ განაცხადებს.
გამოცემის ინფორმაციით, კრემლის ცნობილი კრიტიკოსი, პროფესორი ვალერი სოლოვეი აცხადებს, რომ პუტინს პარკინსონის დაავადება აქვს და ოჯახის წევრები თანამდებობის დატოვებისკენ მოუწოდებენ.
სოლოვეის თქმით, პუტინის პარტნიორი ალინა კაბაევა, ისევე როგორც მისი ქალიშვილები 35 წლის მარია ვორონცოვა და 34 წლის კატერინა ტიხონოვა პუტინს ურჩევენ, თანამდებობა დატოვოს.
მედიის ინფორმაციით, ამ ეჭვებს კიდევ უფრო მეტად აძლიერებს ის გარემოებები, რომ ახალი კანონპროექტით, სამართლებრივი დევნის მიმართ, რუსეთის ყოფილი პრეზიდენტების იმუნიტეტი ფართოვდება.
ექსპრეზიდენტების იმუნიტეტი სამართლებრივი დევნის შესახებ, შესაძლოა გავრცელდეს არა მხოლოდ პრეზიდენტობის მოვალეობის შესრულების დროს ჩადენილ დანაშაულებზე, არამედ იმათზეც, რაც მათ მთელი ცხოვრების განმავლობაში ჩაუდენიათ.
გავრცელებულ ინფორმაციას, პუტინის ჯანმრთელობის მდგომარეობისა და თანამდებობის დატოვების შესახებ, გამოეხმაურა კრემლის პრესსპიკერი დმიტრი პესკოვი, რომელმაც მკაცრად უარყო ცნობები და მას სრული სისულელე უწოდა.
