რომის პაპი ფრანცისკე პირბადით საჯარო ღონისძიებაზე პირველად გამოჩნდა, სადაც ის და სხვა რელიგიური ლიდერები დაესწრნენ ეკუმენურ ლოცვას მსოფლიოში მშვიდობისთვის.
ეკუმენური ლოცვა, რომელსაც რომის პაპი ესწრებოდა, რომში, სანტა მარია ინ არაჩელის ბაზილიკაში აღევლინა. მანამდე პაპი ნიღბით მხოლოდ მანქანაში უნახავთ, რომლითაც ის ვატიკანში ყოველკვირეული აუდიენციებისთვის მიემართებოდა.
მანამდე პაპს სოციალურ ქსელში აკრიტიკებდნენ იმის გამო, რომ მიღებებზე ნიღაბს არ ატარებდა და ზოგიერთ შემთხვევაში ვიზიტორებთან დასაშვებზე ახლო ფიზიკური კონტაქტი ჰქონდა.
83 წლის ფრანცისკე რომის ბაზილიკაში ლოცვას სხვა ქრისტიან ლიდერებთან ერთად დაესწრო, რომელთა შორის იყო მსოფლიო პატრიარქი ბართოლომეოსი.
რომის პაპმა მშვიდობისა და განსაცდელის ჟამს ერთიანობის მნიშვნელობაზე ისაუბრა.
მისი თქმით, პანდემიამ აჩვენა, რომ "მარტო ვერავინ გადარჩება".
ყოველწლიური ლოცვის ტრადიციას რომის პაპის, იოანე პავლე მეორისა და რომის კათოლიკური საზოგადოების მიერ ჩაეყარა საფუძველი 1986 წელს. წლევანდელი ღონისძიება კორონავირუსის პანდემიის გამო შედარებით მოკრძალებულად ჩატარდა.