ნორვეგია კიბერთავდასხმაში რუსეთს დებს ბრალს.
ნორვეგიის საგარეო საქმეთა მინისტრის ინე ერიქსენ სორაიდეს განცხადებით, 2020 წლის აგვისტოში ნორვეგიის პარლამენტზე განხორციელებული კიბერთავდასხმის უკან რუსეთი დგას.
"მთავრობისთვის ხელმისაწვდომი ინფორმაციის საფუძველზე, ჩვენ გვჯერა, რომ კიბერთავდასხმაზე რუსეთია პასუხისმგებელი", - ნათქვამია ნორვეგიის საგარეო საქმეთა სამინისტროს მიერ გავრცელებულ განცხადებაში.
განცხადებაში პარლამენტის საფოსტო სისტემებზე თავდასხმა აღწერილია, როგორც "ძალზედ სერიოზული ინციდენტი ნორვეგიის ყველაზე მნიშვნელოვან დემოკრატიულ ინსტიტუტზე".
"როგორც ჩანს საფრთხეებმა ციფრულ ასპარეზზე გადაინაცვლა", - ვკითხულობთ განცხადებაში.
მანამდე, ნორვეგიის პარლამენტის IT დეპარტამენტის ხელმძღვანელმა, მარიანა ანდრეასენმა განაცხადა, რომ პარლამენტი იყო კიბერშეტევის მსხვერპლი, რომელიც მიზნად ისახავდა შიდა ელექტრონული სისტემის მწყობრიდან გამოყვანას.
ვრცელდებოდა ინფორმაცია, რომ ზოგიერთი პარლამენტარის ელექტრონული ფოსტიდან დიდი რაოდენობით მონაცემები მოიპარეს .
