დღეს, ბრიუსელში ევროკავშირის ლიდერების შეხვედრად გამართავენ.
სამიტი ფოკუსირებული იქნება რამდენიმე მნიშვნელოვან საკითხზე, მათ შორის, სომხეთსა და აზერბაიჯანს შორის მიმდინარე სამხედრო კონფლიქტზე, ბელარუსში არსებული ვითარებასა და რუსი ოპოზიციონერი ლიდერის, ალექსეი ნავალნის "ნოვიჩოკით" მოწამვლაზე.
ვრცელდება ინფორმაცია, რომ შესაძლოა ამ სამიტის ფარგლებში ევროკავშირის ლიდერებმა მიაღწიონ შეთანხმებას ბელარუსისთვის სანქციების დაწესების თაობაზე.
სამიტის ფარგლებში ასევე განხილული იქნება ხმელთაშუა ზღვის აღმოსავლეთ ნაწილში წარმოშობილი დაძაბულობა, რაც თურქეთის მიერ ენერგორესურსების ძიების პროცესის დაწყებას მოჰყვა. საბერძნეთი და კვიპროსი მკაცრად გმობენ თურქეთის ამ მოქმედებას და ევროკავშირისგან გადამჭრელი ზომების მიღებას ითხოვენ.
ევროკავშირის სამიტი გასულ კვირას უნდა გამართულიყო, მაგრამ ევროპული საბჭოს პრეზიდენტი შარლ მიშელი იძულებული გახდა თვითიზოლაციაში გადასულიყო, ამიტომაც ლიდერების შეხვედრა გადაიდო.
ევროკავშირის სამიტი 1-2 ოქტომბერს გაიმართება.