სომხეთის მთავრობის გადაწყვეტილებით, ქვეყანაში საომარი მდგომარეობა გამოცხადდა. ამის შესახებ პრემიერ-მინისტრმა, ნიკოლ ფაშინიანმა განაცხადა.
"მთავრობის გადაწყვეტილებით, სომხეთის რესპუბლიკაში გამოცხადდა საომარი მდგომარეობა და საყოველთაო მობილიზაცია. გადაწყვეტილება ძალაში მისი გამოქვეყნებისთანავე შედის. მოვუწოდებ შეიარაღებული ძალების პირად შემადგენლობას, გამოცხადდნენ სამხედრო კომისარიატებში. ჩვენი სამშობლოს, ჩვენი გამარჯვებისთვის", - წერს ფაშინიანი სოციალურ ქსელში.
მანამდე მთიანი ყარაბაღის არაღიარებულმა რესპუბლიკამ საომარი მდგომარეობა და სამხედრო მობილიზაცია გამოაცხადა.
სომხეთისა და აზერბაიჯანის საზღვარზე ვითარება დღეს დილიდან უკიდურესად დაიძაბა. მხარეები ერთმანეთს სამხედრო თავდასხმაში ადანაშაულებენ.
აზერბაიჯანის თავდაცვის სამინისტრო იუწყება, სომხეთის მხრიდან დღეს დილით ფართომასშტაბიანი შეტევა განხორციელდა.
სომხეთი აცხადებს, რომ აზერბაიჯანმა დაიწყო შეტევა მთიან ყარაბაღზე.
არსებობს ინფორმაცია ორივე მხრიდან დაჭრილ და მოკლულ მშვიდობიან მოსახლეობასა და სამხედრო მოსამსახურეებზე.
ფოტო: Reuters/არქივი