ბელარუსის ოპოზიციის ლიდერს, მარია კალესნიკოვას ბრალი წარუდგინეს.
როგორც სააგენტო "ინტერფაქსი" იტყობინება, ბელარუსის საგამოძიებო უწყებამ კალესნიკოვას ბრალი ეროვნული უსაფრთხოებისათვის ზიანის მიყენებისთვის წარუდგინა.
თვეზე მეტია ბელარუსში გრძელდება მასობრივი პროტესტი საპრეზიდენტო არჩევნების შედეგების წინააღმდეგ, რომელშიც გამარჯვებული გამოცხადდა ამჟამინდელი სახელმწიფოს მეთაური ალიაქსანდრ ლუკაშენკა, რომელიც ამ თანამდებობას 1994 წლიდან იკავებს.
არჩევნები 9 აგვისტოს გაიმართა. ცესკოს მიერ დამტკიცებული შედეგების თანახმად, ამომრჩეველთა 80.1% -მა ხმა მისცა ლუკაშენკას, 10.12% - მის მთავარ მოწინააღმდეგეს სვიატლანა ციხანოუსკაიას.
გუშინ ევროკავშირის უმაღლესმა წარმომადგენელმა უსაფრთხოების პოლიტიკასა და საგარეო საკითხებში, ჟოზეპ ბორელმა განაცხადა, რომ ევროკავშირი ლუკაშენკას ლეგიტიმურ პრეზიდენტად არ აღიარებს.
ამ დროისთვის ოპოზიციური გაერთიანების ყველა წევრი ან დაკავებულია, ან იმყოფება რესპუბლიკის გარეთ.
მარია კალესნიკოვა 7 სექტემბერს დააკავეს.
კალესნიკოვას ადვოკატი აცხადებს, რომ მისი დაცვის ქვეშ მყოფი გატაცებად მიიჩნევს იმას, რაც მას უკანასკნელ დღეებში დაემართა და ბრალდება აბსურდულად და პოლიტიკურად მოტივირებულად მიაჩნია.