მტკიცებულება საკვების მეშვეობით COVID-19-ის გადაცემის შესახებ არ არსებობს. ამის შესახებ ჯანმრთელობის მსოფლიო ორგანიზაციის საგანგებო მდგომარეობის პროგრამების დირექტორმა მაიკლ რაიანმა ბრიფინგზე განაცხადა.
"არ არსებობს მტკიცებულება იმისა, რომ პროდუქტის ჯაჭვი ვირუსის გადაცემაში მონაწილეობს“, - აღნიშნა მან.
ჯანმრთელობის მსოფლიო ორგანიზაციის საგანგებო დაავადებათა ტექნიკური ჯგუფის ხელმძღვანელმა მარია ვან კერკხოვემ თავის მხრივ აღნიშნა, რომ ვირუსი შესაძლოა დარჩეს შეფუთვაზე, როგორც ეს ქათმის ფრთების შეკვრაზე, რომელიც ბრაზილიიდან ჩინეთში იყო იმპორტირებული.
"რამდენადაც ვიცით, ჩინეთმა ჩაატარა შეფუთვის ტესტირება. გაიტესტა რამდენიმე ასეული შეკვრა, მათგან მხოლოდ ათმა აჩვენა დადებითი შედეგი. ვირუსი, შესაძლოა, მართლაც დარჩეს ზედაპირზე გარკვეული დროის განმავლობაში. მაგრამ თუ ვირუსი აღმოჩნდება საკვებში, ის განადგურდება მომზადების პროცესში, ისე როგორც სხვა ვირუსები", - დასძინა ექსპერტმა.
შეგახსენებთ, ჩინეთში ქალაქ შენჟენის ხელისუფლებამ გაავრცელა ინფორმაცია, რომ ბრაზილიიდან იმპორტირებულ ქათმის გაყინულ ფრთებზე კორონავირუსი აღმოჩნდა.
ქალაქის ჯანდაცვის უწყებამ ტესტირება ყველა იმ ადამიანს ჩაუტარა, რომელსაც საკვებთან კონტაქტი შეიძლებოდა ჰქონოდა, თუმცა ყველა ანალიზის პასუხი ნეგატიური აღმოჩნდა.