აზერბაიჯანის თავდაცვის სამინისტროს ინფორმაციით, სომხეთის შეიარაღებული ძალების წარმომადგენლებმა სცადეს საზღვრის გადაკვეთა აზერბაიჯანულ ქალაქ თოვუზის მიმართულებით.
აზერბაიჯანის თავდაცვის უწყების ინფორმაციით, სომხეთის მხრიდან აზერბაიჯანის მიმართულებით საარტილერიო დანადგარებიდან ისროდნენ, რის შედეგად, დაიღუპა 2 და დაშავდა 5 აზერბაიჯანელი სამხედრო.
როგორც ოფიციალური ბაქო იტყობინება, აზერბაიჯანელმა სამხედროებმა მოახერხეს სომხეთის შეიარაღებული არმიის წამომადგენლების უკუგდება.
აზერბაიჯანის მიერ გავრცელებული ცნობის სრულიად განსხვავებულ ინფორმაციას ავრცელებს სომხეთის თავდაცვის სამინისტრო.
სომხეთის თავდაცვის სამინისტრო იტყობინება, რომ აზერბაიჯანის შეიარაღებული ძალები შეეცადნენ გადაეკვეთათ სომხეთის საზღვარი და სომხური პუნქტის მიმართულებით ცეცხლი გახსნეს.
"აზერბაიჯანის შეიარაღებულმა ძალებმა საარტილერიო ცეცხლი გახსნეს ჩვენი ტერიტორიის მიმართულებით, საპასუხოდ ჩვენც გავხსენით ცეცხლი, რის შემდეგაც მათ უკან დაიხიეს", - აცხადებს სომხეთის თავდაცვის უწყება.
როგორც ერევანი იტყობინება, სომხურ მხარეს დანაკარგი არ აქვს.
ფოტო: არქივი