შეერთებულ შტატებში, კალიფორნიის კინოინდუსტრიული ქალაქი ჰოლივუდი ფილმებისა და სერიალების გადაღებებს 12 ივნისიდან განაახლებს. ინფორმაციას გამოცემა Los Angeles Times-ი შტატის გუბერნატორის ოფისზე დაყრდნობით ავრცელებს.
მანამდე სახელმწიფო ჯანდაცვის დეპარტამენტი იუწყებოდა, რომ კინო, ტელევიზია და მუსიკალური წარმოება შეიძლება განახლდეს მხოლოდ ოლქის ჯანმრთელობის ინსპექტორის ნებართვის შემდეგ.
მიმდინარე კვირაში კინოსტუდიები და პროფკავშირები შეთანხმდნენ, კინოწარმოების ახალ პროტოკოლებზე, სადაც პოსტპანდემიურ პერიოდში გადაღებების პროცესში სხვადასხვა შეზღუდვებია გათვალისწინებული. მაგალითისთვის, გადასაღებ მოედნებზე გაუქმდება ე.წ. "შვედური მაგიდები", ხოლო რეკვიზიტებს სადეზინფექციო ხსნარით დაამუშავებენ.
გრიმიორებს, სტილისტებსა და მაკიაჟის სპეციალისტებს მსახიობებთან კონტაქტის მინიმუმამდე შემცირება და სამუშაოს შესრულებისას დამცავი პირბადეების ტარება მოუწევთ.
როდესაც კალიფორნია ცდილობს კინოინდუსტრიის აღდგენას, ზოგიერთი კინო და ტელემწარმოებელი კომპანია, მათ შორის Netflix-ი აგრძელებს გადაღებებს ისეთ ქვეყნებში, სადაც ეპიდემია ნაკლებად მძვინვარებს, მაგალითად, ისლანდიასა და სამხრეთ კორეაში.
