სასტუმროების ფასების ინდექსი 2018 წლის აგვისტოში, ივლისის თვესთან შედარებით, 0.01%-ით გაიზარდა. PMCG-ის ინფორმაციით, სასტუმროების სტანდარტული ორ ადგილიანი ნომრების ფასები ყველაზე მეტად გურიაში - 7.6%-ით და იმერეთში - 1.4%-ით გაიზარდა.
გურიის სასტუმროების ფასების ზრდა, ძირითადად, ურეკის (14%) სასტუმროების ფასების ზრდამ განაპირობა. იმერეთის სასტუმროების ფასების ზრდა ძირითადად განაპირობა ქუთაისის სასტუმროების ფასების ზრდამ (1.5%), საქართველოს ათ რეგიონს და თბილისს შორის, 2018 წლის აგვისტოში, ივლისის თვესთან შედარებით, სასტუმროს ფასები ექვს რეგიონში შემცირდა.
ყველაზე მეტად ფასები სამცხე-ჯავახეთში და მცხეთა-მთიანეთში შემცირდა, შესაბამისად 1.6% და 1.3%-ით. სამცხე-ჯავახეთში ფასების შემცირება ძირითადად ბაკურიანის სასტუმროების ფასების კლებამ განაპირობა (4.7%-ით). მცხეთა-მთიანეთში ფასების კლება კი ძირითადად განპირობებულია გუდაურის სასტუმროების ფასების კლებით (10%).
3, 4 და 5 ვარსკვლავიანი სასტუმროების ფასების ინდექსი 2018 წლის აგვისტოში, ივლისთან შედარებით, 0.9%-ით შემცირდა. ამ ტიპის სასტუმროებში ფასები ყველაზე მეტად მცხეთა-მთიანეთში - 4.1%-ით და სამცხე-ჯავახეთში - 3.4%-ით შემცირდა. მცხეთა-მთიანეთში ფასების შემცირება განაპირობა გუდაურის, ხოლო სამცხე-ჯავახეთში ბორჯომის სასტუმროების ფასების კლებამ. 3, 4 და 5 ვარსკვლავიანი სასტუმროების ფასების ზრდა მხოლოდ გურიაში და კახეთში დაფიქსირდა, შესაბამისად 18.4% და 0.1%. გურიის 3, 4 და 5 ვარსკვლავიანი სასტუმროების ფასების ზრდა განპირობებულია ურეკის ფასების ზრდით. კახეთში კი ფასების ზრდა განაპირობა თელავის და ლაგოდეხის სასტუმროების ფასების ზრდამ.
საოჯახო ტიპის სასტუმროების ფასები აგვისტოში, ივლისის თვესთან შედარებით 0.7%-ით გაიზარდა. რეგიონების მიხედვით, ფასები ყველაზე მეტად იმერეთში და აჭარაში გაიზარდა, შესაბამისად, 4.1% და 2.2%-ით. იმერეთის ფასების ზრდა ძირითადად განპირობებულია ქუთაისის, ხოლო აჭარის - ქობულეთის და მახინჯაურის საოჯახო ტიპის სასტუმროების ფასების ზრდით. საოჯახო ტიპის სასტუმროებში, აგვისტოში, ივლისთან შედარებით, ფასები ყველაზე მეტად კახეთში და შიდა ქართლში შემცირდა, ორივე რეგიონში 0.9%-ით. კახეთის საოჯახო ტიპის სასტუმროების ფასების შემცირება განპირობებულია თელავის და სიღნაღის, ხოლო შიდა ქართლის სურამის ფასების კლებით.
