სოჭის ოლიმპიური ობიექტებისთვის აფხაზეთიდან ინერტული მასალების გატანა აფხაზეთში ეკოლოგიური კატასტროფას გამოიწვევს.
ამის შესახებ აფხაზეთის ავტონომიური რესპუბლიკის უმაღლესი საბჭოს თავმჯდომარემ, გია გვაზავამ სოფლის მეურნეობის, გარემოს დაცვისა და ბუნებრივი რესურსების კომიტეტის წევრებთან ერთად დღეს გამართულ პრესკონფერენციაზე განაცხადა.
"აფხაზეთიდან სოჭში 100 მილიონი ტონა ინერტული მასალის გატანა იგეგმება. ამის ნახევარი ინერტული მასალაც რომ ამოიღონ მდინარეების კალაპოტებიდან, ეს მდინარეები კალაპოტს ვეღარასოდეს აღიდგენენ", - აღნიშნა გია გვაზავამ.
მისივე განცხადებით, აფხაზეთის ეკოლოგიას საფრთხეს უქმნის რუსული სამხედრო ბაზების მშენებლობაც. გვაზავამ აღნიშნა, რომ ბაზებისთვის საჭირო კომუნიკაციების, მათ შორის სანგრების გათხრა აფხაზეთის ეკოლოგიას სეროიზულად დააზიანებს, რადგან აფხაზეთში უმეტესად ეროზიული მიწებია.
"ასევე, რჩება დანაღმული ტერიტორიების პრობლემა. აფხაზეთში დღემდე 560-ზე მეტი დანაღმული რაიონია, სადაც თითოეულ კვადრატულ კილომეტრზე 6-დან 14-მდე ნაღმია ჩადებული. რაც შეეხება ჭურვების შედეგად მიყენებულ ზარალს, მხოლოდ ერთი საავიაციო ჭურვით დაზიანებული ნიადაგის აღდგენას ათეულობით ასწლეული ესაჭიროება", - განაცხადა გვაზავამ.
მისივე თქმით, უმძიმესი ეკოლოგიური ზარალი მიადგა აფხაზეთის ეკოლოგიას ომის შემდგომ. გვაზავამ აღნიშნა, რომ ომის შემდგომ პერიოდში მთელს აფხაზეთში, მათ შორის სოხუმის ბოტანიკურ ბაღში, უკონტროლოდ იჭრებოდა ძვირფასი ჯიშის ხეები, მათ შორის - წაბლისა და მარწყვის.
"ასევე, უნებართვო და უკონტროლო ნადირობა მიმდინარეობდა აფხაზეთის ნაკრძალებში", - განაცხადა გია გვაზავამ
დღევანდელი პრესკონფერენცია ომის შემდეგ ბუნებრივი გარემოს ექსპლუატაციის აღკვეთის საერთაშორისო დღეს მიეძღვნა.
