სტუდენტებზე გაწეული თანხები კვლავ არარაციონალურად და უსამართლოდ ნაწილდება, - აცხადებს ,,ევროპული საქართველოს“ წევრი სერგო რატიანი. მისი თქმით, განსაკუთრებით შემაშფოთებელია ეს ფაქტი იმ შემთხვევაში, როცა ყოველწლიურად იმატებს სტატუსშეჩერებული სტუდენტების რაოდენობა.
,,ქართული ოცნების ხელისუფლებამ მოსვლის დღიდან სტუდენტების არსებული წესის პარალელურად, შემოიღო პროგრამული დაფინანსების პროგრამა. რაც ჩვენი შეფასებით, თანხების უსამართლო, არარაციონალურ და შესაბამისად, არაეფექტურ წესს წარმოადგენს. მოცემული თანხებით, ძველი, საგრანტო წესის შენარჩუნებით შესაძლებელი იქნებოდა ყოველწლიურად ორჯერ მეტი სტუდენტის დაფინანსება.
მიმდინარე წელს განათლების მინისტრის მიერ დაანონსდა, რომ სტუდენტთა დაფინანსების წესი 2017 წლისათვის აუცილებლად უნდა შეცვლილიყო, უფრო მეტიც, არსებული ფორმა შეფასებული იყო როგორც არასწორი და მავნებლური წესი.
მიუხედავად ამისა, 2017-18 სასწავლო წლისათვის სახელმწიფო სასწავლო გრანტის წლიური მოცულობების, ოდენობებისა და პროგრამული დაფინანსების მოცულობის განსაზღვრის შესახებ სულ ახლახანს მიღებულ მთავრობის დადგენილებაში შეცვლილი არაფერია, იდენტურია გასული წლის და აგრძელებს იმ მანკიერ მიდგომას, რომელიც ქართული ოცნების მთავრობაში მოსვლისთანავე იქნა შემოთავაზებული.
ერთმნიშვნელოვნად შეიძლება ითქვას, რომ მთავრობა და განათლების სამინისტრო სტუდენტებზე გაწეულ თანხებს კვლავ არარაციონალურად და უსამართლოდ ანაწილებს.
არსებული თანხით, სწორად და რაციონალურად განაწილების შემთხვევაში, დაფინანსებულ სტუდენტთა რაოდენობა იქნებოდა ორჯერ მეტი (100%-იანი, 70%-იანი, 50%-იანი და 30%-იანი გრანტები) და მიაღწევდა დაახლოებით 18000 სტუდენტს.
მარტივი მაგალითისთვის, სრული და ნაწილობრივი დაფინანსებით დაახლოვებით 9 მილიონით ფინანსდებოდა 9 ათასამდე სტუდენტი. 30 % დაფინანსების მოხსნის შემდეგ ამ რაოდენობამ დაიკლო 6500 მდე. პროგრამული დაფინანსებით, 12 მილიონით ფინანსდება სრული ოდენობით დაახლოვებით 5000 სტუდენტი. აქედან, ყოველწლიურად დაახლოვებით 1200-დან 1500 სტუდენტამდე იღებს ასევე სხვადსხვა ოდენობის გრანტებს.
არაეფექტურობა და უსამართლობა მდგომარეობს იმაში, რომ პროგრამული დაფინანსების სტუდენტები, სხვა პროგრამებზე იგივე შედეგების მქონე სტუდენტებთან შედარებით, იღებენ ორმაგ დაფინანსებას, ხოლო სტუდენტები, რომლებსაც ეროვნულ გამოცდებზე არ მიუღიათ სასწავლო გრანტები და შესაბამისად, აჩვენეს დაბალი შედეგები, იღებენ 100% დაფინანსებას.
განსაკუთრებით შემაშფოთებელია ეს ფაქტი იმ შემთხვევაში, როცა ყოველწლიურად იმატებს სტატუსშეჩერებული სტუდენტების რაოდენობა. წლევანდელი მონაცემებით ეს რაოდენობა უკვე 38000-ს გაუტოლდა. მიუხედავად ამისა და ამასთანავე, ამ ხნის განმავლობაში ჩემი არაერთგზის მოწოდებისა, დეტალურად შეგვესწავლა ეს პრობლემა და დაუყოვნებლივ მოგვეძებნა გამოსავალი, მთავრობა მაინც ჯიუტად უჭერს მხარს და აგრძელებს მართლაც მავნებლური, არარაციონალური და არსამართლიანი პოლიტიკის განხორციელებას ამ მიმართულებით, რითაც თავისმხრივ არაეფექტურს ხდის განათლების სფეროში დაფინანსების სისტემას და არასამართლიანი გადანაწილებით უაზროდ ფლანგავს სახელმწიფო ბიუჯეტიდან მილიონობით ლარს”, - აცხადებს რატიანი.